У ДТЗ пад Гомелем загінуў кіроўца грузавіка, ён не быў прышпілены рамянём бяспекі
24 верасня, Позірк. У дарожна-транспартным здарэнні ў Гомельскім раёне загінуў 61-гадовы мужчына, паведамляе прэс-служба УДАІ Гомельскага аблвыканкама.
Паводле папярэдняй інфармацыі, 23 верасня каля 17:30 кіроўца грузавога аўтамабіля “ГАЗ”, рухаючыся па вул. Маладзёжнай вёскі Маркавічы не справіўся з кіраваннем, з’ехаў на правую па ходзе руху абочыну, сутыкнуўся з дрэвам, затым апорай ЛЭП. Грузавік перакуліўся.
Адзначаецца, што мужчына памёр на месцы здарэння, рамянём бяспекі ён прышпілены не быў.
Па гэтым факце праводзіцца праверка, устанаўліваюцца падрабязнасці ДТЗ, на месцы здарэння працавалі супрацоўнікі ДАІ і следча-аператыўная група.
