Папраўкі ў Выбарчы кодэкс не будуць канцэптуальнымі і істотнымі — ЦВК

25 верасня, Позірк. Запланаваныя папраўкі ў Выбарчы кодэкс не будуць канцэптуальнымі і істотнымі, заявіў 25 верасня старшыня Цэнтральнай выбарчай камісіі (ЦВК) Ігар Карпенка на пасяджэнні органа.

ЦВК плануе ў 2027 годзе “ўвайсці ў план законапраектнай дзейнасці з папраўкамі”, сказаў ён.

Карпенка, як паведамляецца ў тэлеграм-канале камісіі, паведаміў пра сустрэчу з намеснікамі старшыні мясцовых выканкамаў, на якой абмяркоўвалася ўстаноўка на выбарчых участках шырма замест кабін для галасавання.

“У нас сёння ў законе жорстка напісана: галасуюць альбо ў кабінах, альбо ў пакоях для галасавання. Навошта нам марнаваць шалёныя грошы на часовую кабіну, якая потым пяць гадоў нікім не выкарыстоўваецца, <…> шырма каштуе танней значна і ніякім чынам не парушае таямніцу волевыяўлення грамадзяніна”, — заявіў Карпенка.

Паводле кіраўніка ЦВК, “канцэптуальных праблем са змяненнем заканадаўства няма, ёсць тыя праўкі, якія прадыктаваны жыццём, і якія патрабуюць сур’ёзнага аналізу, і прапрацоўкі, і ўключэння ў заканадаўчы акт”.

Павродле дзяржСМІ, ён таксама заявіў, што гэта будзе “ўдакладненне некаторых норм заканадаўства, якія выклікалі, можа быць, пэўныя пытанні падчас правядзення [ранейшых] электаральных кампаній”.

Праца “будзе весціся публічна”, сцвярджае Карпенка.

У маі гэтага года кіраўнік ЦВК анансаваў, што “да чарговага выбарчага цыкла, які пачнецца ўжо ў 2029 годзе, <…> можам скарэкціраваць некаторыя нормы выбарчага заканадаўства”.

Ён “унёс прапанову аб стварэнні рабочай групы, якая на працягу 2025–2026 гадоў адпрацуе ўсе прапановы і магчымыя змяненні ў Выбарчы кодэкс, каб у 2027 годзе прайсці ўсе працэдуры ўключэння змяненняў і дапаўненняў і прыняцця адпаведнага заканадаўчага акта”.

Пад “электаральным цыклам” улады маюць на ўвазе правядзенне працэдур чарговых парламенцкіх і прэзідэнцкіх выбараў у 2029 і 2030 гадах. Папярэднія адбыліся ў 2024 і 2025 гадах (26 студзеня).

З 1996 года ніводная выбарчая кампанія ў Беларусі не была прызнана незалежнымі назіральнікамі транспарэнтнай і адпаведнай дэмакратычным стандартам.

Карпенка, Цэнтрвыбаркам і персанальна шэраг яго сябраў знаходзяцца пад санкцыямі Еўрасаюза. Кіраўнік ЦВК таксама пад абмежаваннямі з боку Вялікабрытаніі і Канады.