Ціханоўская: Максім Знак стаў сапраўднай крыніцай натхнення для беларусаў

27 верасня, Позірк. Палітвязень Максім Знак стаў “сапраўднай крыніцай натхнення для беларусаў і многіх людзей па ўсім свеце”, заявіла дэмакратычны лідар Святлана Ціханоўская 25 верасня ў Нью-Йорку на цырымоніі ўручэння 10-й прэміі Цэнтра Вацлава Гавела “Disturbing the Peace” (“Парушэнне спакою”).

Як паведаміў “Позірку” галоўны дарадца палітыка Франак Вячорка, Ціханоўская адзначыла, што для яе “вялікі гонар прыняць гэтую ўзнагароду” ад імя Знака.

“Максім не можа быць з намі. Ён знаходзіцца за кратамі ў лукашэнкаўскім ГУЛАГу — прыгавораны да 10 гадоў пазбаўлення волі за выкананне свайго прафесійнага абавязку юрыста. У сённяшняй Беларусі абарона правасуддзя стала “цяжкім злачынствам”, — падкрэсліла дэмлідар.

На яе думку, лёс палітвязня нагадвае пра самога Гавеля, які быў зняволены за тое, што адважыўся “жыць па праўдзе”.

“Як і Гавел, Максім адмовіўся аддаць сваё сумленне. Як і Гавел, Максім — летуценнік і аптыміст”, —лічыць Ціханоўская.

Яго кнігі і вершы, сказала палітык, “поўныя надзеі, гумару і кахання — любові да людзей”.

“Дыктатары ненавідзяць свабодалюбцаў, таму што нават у турме яны застаюцца вальнейшымі за сваіх турэмшчыкаў. Іх дух, іх годнасць, іх унутраную свабоду немагчыма зламаць, — падкрэсліла дэмлідэр. — Ушаноўваючы Максіма сёння, мы ўшаноўваем кожнага беларуса, які адмаўляецца здавацца — кожнаму пісьменніку, кожнаму пісьменніку, я. такіх людзей, як нобелеўскі лаўрэат Алесь Бяляцкі, сябар Гавела, якому сёння спаўняецца 63 гады – яго пяты дзень нараджэння ў турме“.

Ціханоўская нагадала, што ў сваёй кнізе Знак жартам параўноўвае турму з цягніком, дзе ніхто не ведае, колькі часу зойме дарога да патрэбнай станцыі. “Давайце спынім гэты пякельны цягнік і вызвалім усіх яго пасажыраў!” — заклікала палітык.

Пра тое, што Знак стаў ляўрэатам прэміі, Цэнтр Вацлава Гавэла паведаміў 8 жніўня.

Адзначалася, што беларус напісаў у зняволенні твор “Зэкамерон” — цыкл са 100 апавяданняў, у якіх апісваецца паўсядзённае жыццё за кратамі.

“Рэцэнзенты апісваюць “Зекамерон” як твор, у якім “банальнасць і жорсткасць супернічаюць з чалавечай здольнасцю пераадольваць прыгнёт”. “Тон лаканічны, іранічны, гумар сухі. Апавяданні сведчаць аб супраціўленні і самасцвярджэнні, а таксама аб сапраўднай цеплыні і ўдзячнасці сукамернікаў», — гаварылася ў паведамленні.

Знак быў юрыстам у штабе прэтэндэнта на пасаду прэзідэнта Віктара Бабарыка на выбарах 2020 года, увайшоў у прэзідыум першага складу Кардынацыйнай рады.

6 верасня 2021 года прыгавораны па трох артыкулах Крымінальнага кодэкса да 10 гадоў пазбаўлення волі.

Вацлаў Гавэл (1936–2011) — чэшскі пісьменнік, драматург, дысідэнт, праваабаронца і дзяржаўны дзеяч. Апошні прэзідэнт Чэхаславакіі (1989–1992) і першы прэзідэнт Чэхіі (1993–2003).