Прэзідэнт Польшчы Наўроцкі возьме ўдзел у перапахаванні пісьменніка, ураджэнца Беларусі Сяргея Пясецкага

28 верасня, Позірк. Перапахаванне пісьменніка Сяргея Пясецкага пройдзе 29 верасня ў Варшаве, паведамляецца на сайце польскага Інстытута нацыянальнай памяці.

Цырымонія пачнецца а 12:00 у Кафедральным саборы Войска Польскага (вул. Длуга, 13/15), у ёй возьме ўдзел прэзідэнт Польшчы Караль Наўроцкі.

У паведамленні Пясецкі названы “ўдзельнікам польска-бальшавіцкай вайны, агентам разведкі, салдатам Арміі Краёвай, выбітным пісьменнікам”.

“У цырымоніі пахавання прымуць удзел прадстаўнікі вышэйшых дзяржаўных органаў, кіраўніцтва Інстытута нацыянальнай памяці і госці. Арганізатарам свята з’яўляецца Інстытут нацыянальнай памяці”, — гаворыцца ў паведамленні.

Парэшткі пісьменніка будуць перапахаваныя на Вайсковых могілках у варшаўскім мікрараёне Павонзкі.

Пясецкі нарадзіўся 1 красавіка 1901 года ў Ляхавічах (цяпер Брэсцкая вобласць). Удзельнічаў на тэрыторыі Беларусі ў антысавецкім руху. Падчас Другой сусветнай вайны далучыўся да Арміі Краёвай. У 1946 годзе эміграваў спачатку ў Італію, затым у Вялікабрытанію. Памёр у 1964 годзе, быў пахаваны ў Англіі.

Роднымі мовамі Пясецкага былі беларуская і руская, свае творы ён пісаў па-польску. Стварыў 12 раманаў, таксама пісаў навелы, кінасцэнарыі, публіцыстычныя артыкулы.