Беларусь аднавіла пастаўкі бензіна ў РФ — СМІ

30 верасня, Позірк. На фоне “высокага попыту і пазапланавых прыпыненняў нафтаперапрацоўчых заводаў” у ліпені аднавіліся продажы бензіну з Беларусі праз Пецярбургскую біржу, паведамляе РБК.

“Гэта адбылося пасля працяглага перапынку, які пачаўся ўвосень 2024 года”, — адзначае выданне.

Паведамляецца, што за ліпень — верасень 2025 года на таргах рэалізавана 96,9 тыс. тон беларускіх нафтапрадуктаў — на 36% больш, чым за аналагічны перыяд 2024-га.

“У верасні продажы бензіну з беларускіх НПЗ выраслі на 168% месяц да месяца, а дызеля — на 83%”, — адзначаецца ў публікацыі.

Пры гэтым, як заяўляецца, пастаўкі паліва з Беларусі “носяць непастаянны характар, і гэтым разам іх аднаўленне супала з пачаткам росту напружання на ўнутраным рынку паліва ў Расіі”. “Эксперты лічаць іх долю ў агульным аб’ёме попыту невялікай, але важнай для вырашэння сітуацыйных праблем”, — гаворыцца ў матэрыяле.

Праблемы з палівам паўсталі ў РФ праз рэгулярныя атакі ўкраінскіх БПЛА расійскіх нафтаперапрацоўчых заводаў.

Продажы беларускіх нафтапрадуктаў у РФ носяць нерэгулярны характар. У жніўні 2024 года таксама паведамлялася аб аднаўленні такіх паставак праз рост коштаў паліва ў Расіі.

За 2023 год Беларусь паставіла ў Расію 45 тыс. тон бензіну і 270 тыс. тон дызпаліва.