У Беларусь прыбыла ваенная дэлегацыя Кубы

6 кастрычніка, Позірк. Кубінская ваенная дэлегацыя на чале з начальнікам Генеральнага штаба — першым намеснікам міністра Рэвалюцыйных Узброеных сіл Раберта Легра Саталонга прыбыла ў Беларусь.

Праграмай афіцыйнага візіту, як паведамляе беларускае Мінабароны, прадугледжаны перамовы з кіраўніцтвам УС і наведванне воінскіх часцей і аб’ектаў.

Асноўная мэта заяўлена як “вызначэнне практычных мерапрыемстваў па падрыхтоўцы кубінскіх ваеннаслужачых з улікам вопыту сучасных узброеных канфліктаў”, паведаміў у сацсетцы Х начальнік Дэпартамента міжнароднага ваеннага супрацоўніцтва, памочнік міністра абароны па пытаннях міжнароднага ваеннага супрацоўніцтва Валерый Равенка.

4 жніўня начальнік Генеральнага штаба Узброеных сіл — першы намеснік міністра абароны Павел Муравейка знаходзіўся на Кубе з візітам.

Міністр абароны Беларусі Віктар Хрэнін наведваў Кубу ў студзені 2024 года. На сустрэчы са сваім кубінскім калегам міністрам Рэвалюцыйных узброеных сіл Альвара Лопесам М’ерай ён сярод іншага абмяркоўваў узаемадзеянне і міжнароднае становішча. Па выніках сустрэчы былі падпісаны дакументы аб двухбаковым ваенным супрацоўніцтве.

У сакавіку таго ж года на Кубе адбыліся перамовы Віктара Гулевіча, які займаў тады пасаду начальніка Генштаба ВС (адпраўлены ў адстаўку 10 траўня 2025-га) з міністрам М’ерай і начальнікам Генштаба гэтай краіны Раберта Легра Саталонга.

Кубінская ваенная дэлегацыя наведвала Беларусь у красавіку 2024 года. Тады была пацверджана ўзаемная зацікаўленасць у развіцці кантактаў па лініі Ваенна-паветраных сіл і войскаў супрацьпаветранай абароны.

Праз некалькі месяцаў, у чэрвені, у Мінск прыбыў міністр М’ера. На перагаворах з Хрэніным была падкрэслена “важнасць прадаўжэння практычнага вектара ўзаемадзеяння, накіраванага на ўмацаванне супрацоўніцтва ў ваеннай сферы”. У рамках таго візіту кубінская дэлегацыя наведала адну з брыгад Сіл спецыяльных аперацый УС.

29 студзеня 2025 года пры Мінабароны быў акрэдытаваны ваенны, ваенна-марскі і ваенна-паветраны аташэ пасольства Кубы ў Беларусі Мігель Анхель Перэс Боўса. У Мінску ўпершыню адкрылася “рэзідэнцыя ваеннага дыпламата”.

Прэзідэнт Кубы Мігель Марыё Дыяс-Канэль Бярмудэс, які займае таксама пасаду першага сакратара Цэнтральнага камітэта Камуністычнай партыі, наведваў Беларусь у канцы чэрвеня гэтага года — у якасці кіраўніка дзяржавы са статусам назіральніка ў ЕАЭС ён удзельнічаў у Вышэйшай Еўразійскай эканамічнай радзе.

Куба — адна з самых бедных краін Лацінскай Амерыкі і Карыбскага басейна. Пазіцыянуе сябе як сацыялістычная рэспубліка, адзіная партыя ў краіне — камуністычная, апазіцыя пераследуецца.

У траўні 2025 года ў Гаване прайшло чарговае пасяджэнне кубінска-беларускай камісіі па гандлёва-эканамічным супрацоўніцтве.

У сярэдзіне лютага на Нацыянальным прававым інтэрнэт-партале быў апублікаваны пратакол да міжурадавага пагаднення ад 24 чэрвеня 2014 года з пералікам тавараў, якія Беларусь і Куба хацелі б пастаўляць адзін аднаму ў рамках “сустрэчнага гандлю”. Згодна з дакументам, для кожнага боку “пры ўзаемных пастаўках тавараў і паслуг вызначаецца ліміт у 15 млн долараў ЗША на пяцігадовы перыяд”.

17 ліпеня мінулага года прэзідэнт Кубы на сустрэчы з Раманам Галоўчанкам, які тады ўзначальваў беларускі ўрад, асудзіў санкцыі ЗША супраць Беларусі і “ўмяшанне ў яе справы”.