Турчын далажыў Лукашэнку аб “актуальных пытаннях” эканамічнага парадку дня, Вальфовіч — аб ходзе раптоўнай праверкі арміі

15 кастрычніка, Позірк. “Падрабязныя даклады” прэм’ер-міністра Аляксандра Турчына і дзяржсакратара Савета бяспекі Аляксандра Вольфавіча заслухаў 15 кастрычніка Аляксандр Лукашэнка, паведамляе яго прэс-служба.

Адзначаецца, што даклад Турчына “ўключаў актуальныя пытанні ўнутранага парадку дня і ўзаемадзеяння з ключавымі партнёрамі Беларусі на знешнеэканамічным трэку“. “Таксама даложана аб выніках праведзенай у першай палове дня 15 кастрычніка сустрэчы Аляксандра Турчына з міністрам прамысловасці і гандлю Расіі Антонам Аліханавым“, — гаворыцца ў паведамленні.

Як заяўляецца, Лукашэнка ў чарговы раз запатрабаваў ад Турчына “сур’ёзна заняцца“ прамысловай галіной, у якой назіраецца зніжэнне аб’ёмаў вытворчасці.

Па выніках даклада Турчын заявіў дзяржСМІ, што Беларусь і Расія дамовіліся аб умовах узаемадзеяння ў сферы нафтаперапрацоўкі. “Літаральна сёння мы завяршылі, скажам так, паўгадавую няпростую працу з нашымі расійскімі партнёрамі па ўмовах функцыянавання гэтай галіны на сярэднетэрміновую перспектыву. На ўзаемавыгадных умовах. Якія дазваляюць нашым нафтаперапрацоўчым заводам эфектыўна працаваць”, — сказаў ён.

Прэм’ер таксама адзначыў, што “пытанне працы галіны разглядалася таксама ў кантэксце сітуацыі на рынку нафтапрадуктаў у суседніх краінах”.

“Я далажыў прэзідэнту, што сітуацыя на ўнутраным рынку з забеспячэннем нафтапрадуктамі ў нас стабільная і ніякіх узрушэнняў проста не можа быць“, — сказаў прэм’ер.

Галоўнай тэмай дакладу Вальфовіча названая раптоўная праверка Узброеных сіл, якая праводзіцца па даручэнні Лукашэнкі.

Паведамляецца, што “гаворка ішла пра асаблівасці другога этапу праверкі і першыя вынікі ў цэлым”.

Таксама суразмоўцы “закранулі напрамкі“, на якія Лукашэнка “і раней патрабаваў звярнуць асаблівую ўвагу: прымяненне беспілотнікаў і сродкаў радыёэлектроннай барацьбы; досвед “спецыяльнай ваеннай аперацыі“ ва Украіне, які неабходна ўлічваць пры падрыхтоўцы айчынных Узброеных сіл”.

Адметна, што прэс-служба Лукашэнкі не апублікавала фота сустрэч з Турчыным і Вальфовічам.

8 кастрычніка Вальфовіч дакладваў Лукашэнку аб “інцыдэнтах з залётам на тэрыторыю Беларусі беспілотных лятальных апаратаў“ і выніках сумесных беларуска-расійскіх вучэнняў “Захад-2025″.

Папярэдні даклад Турчына Лукашэнкі адбыўся 23 верасня. Тады прэм’ер-міністр падвергнуўся жорсткай крытыцы, перш за ўсё, за адставанне ў прамысловай вобласці.

Неўзабаве пасля гэтага, 25 верасня, Лукашэнка, паводле слоў кіраўніка яго адміністрацыі Дзмітрыя Крутога, “абазначыў“ на перамовах у Маскве прэзідэнту Расіі Уладзіміру Пуціну “праблему нядобрасумленнай канкурэнцыі на рынку прамысловых тавараў і машынабудаўнічай прадукцыі“.