16 кастрычніка, Позірк. Культурныя каштоўнасці без дэкларацыі былі знойдзеныя сярод асабістых рэчаў грамадзяніна Беларусі, які вяртаўся з Польшчы, паведамляе прэс-служба Дзяржаўнага мытнага камітэта.
Паводле інфармацыі ведамства, мужчына накіроўваўся праз “зялёны калідор” пункта пропуску Брэст. Аглядаючы аўтамабіль, мытнік знайшоў карціну, напісаную алеем напрыканцы ХХ стагоддзя, два камінныя гадзіннікі з ліццёвага мармуру і меднага сплаву, а таксама патэфон.
Прадметы накіравалі на экспертызу ў мытную лабараторыю. Адмыслоўцы прыйшлі да высновы, што карціна і гадзіннікі адносяцца да культурных каштоўнасцяў.
Мужчына заявіў, што яму належыць толькі патэфон, а астатнія прадметы яго папрасіў перавезці цераз мяжу незнаёмы чалавек.
Брэсцкая мытня распачала адміністрацыйны працэс паводле ч. 2 арт. 15.1 КаАП (перамяшчэнне тавараў, якія трапляюць пад мытнае дэклараванне, праз мытную мяжу ЕАЭС з утойваннем ад мытнага кантролю, <…> а роўна спроба такога перамяшчэння). Санкцыя — штраф да 30 базавых велічыняў (1.260 рублёў) з магчымай канфіскацыяй тавараў, што незаконна перамяшчаліся.
