Лукашэнка: Трэба спыніць галасіць і плакацца, што ў нас на вёсцы не хапае людзей
11 лістапада, Позірк. Трэба “спыніць галасіць і плакацца, што ў нас на вёсцы не хапае людзей”, заявіў 11 лістапада Аляксандр Лукашэнка на ўручэнні ўзнагарод работнікам сельскай гаспадаркі.
“Усяго ў нас хапае, і пра гэта сведчыць гэты год, — цытуе Лукашэнку ягоная прэс-служба. — Год быў вельмі цяжкім. Я ў сваім жыцці не магу ўзгадаць такога складанага і напружанага перыяду, які быў у гэтым годзе ў дачыненні да сельскай гаспадаркі і перапрацоўчай прамысловасці. <…> Вы спрацавалі значна лепш, чым у ранейшыя гады. Значна лепш, нягледзячы на ўсё, што адбывалася навокал. <…> Таму трэба спыніць стагнаць, што ў нас у сельскай гаспадарцы шмат праблем. Кожны дзень мы да гэтага павінны быць гатовыя. Таму спыняем плакацца, пачынаем працаваць”.
Паводле слоў палітыка, па выніках 2025 года ад экспарту прадуктаў харчавання і сельгассыравіны чакаюцца “рэкордныя больш за 9 млрд долараў (калісьці, яшчэ ўчора, марылі пра 7 млрд)”.
“Наша задача ў наступным годзе — выйсці на 9,5 млрд долараў. А па выніках новай пяцігодкі пастараемся выйсці і на 12 млрд, — сказаў Лукашэнка. — <…> Дзякуй богу, мне ўдалося ўсё ж такі вас адвярнуць ад гэтых санкцый і не плакацца з нагоды і без нагоды, што ў нас санкцыі. Санкцыі, так, [але самае важнае] — канкурэнцыя. <…> Нас душылі і будуць душыць, пакуль мы не ляжам, не распластаемся, як нашы балтыйскія суседзі, пакуль не знішчым сваю эканоміку. Вось тады мы будзем для іх сябрамі, таму што мы для іх будзем звычайным рынкам, які будзе купляць, спажываць сам і [транзітам] на ўсю Расію і далей пастаўляць. Яны нам будуць везці ўсё: і камбайны, якія мы сёння вырабляем, і трактары… У іх гэта ўсё ёсць. Ім патрэбны рынак”.
Па выніках студзеня — верасня 2025 года Беларусь засталася на апошнім месцы ў Еўразійскім эканамічным саюзе (ЕАЭС) па дынаміцы вытворчасці сельскагаспадарчай прадукцыі, сведчыць праведзенае “Позіркам” параўнанне даных дэпартамента статыстыкі Еўразійскай эканамічнай камісіі (ЕЭК).
У студзені Беларусь заняла 2-е месца ў ЕАЭС па гэтым паказчыку, у студзені — лютым — 4-е, студзені — сакавіку — 4–5 месца (разам з РФ), студзені — красавіку, студзені — траўні, студзені — чэрвені, студзені — ліпені і студзені — жніўні — апошняе.
Шэраг негатыўных з’яў зафіксаваў Камітэт дзяржаўнага кантролю (КДК) па выніках праведзенага ў першай палове верасня маніторынгу ходу восеньскіх работ у сельскагаспадарчых арганізацыях.
Выяўленыя недахопы выклаў у службовым лісце ўраду намеснік старшыні КДК Станіслаў Наркевіч. Копію дакумента ад 18 верасня 2025 года прадаставіла “Позірку” аб’яднанне BelPol.
Адзначалася, што на 18 верасня азімыя збожжавыя былі пасеяныя ў гаспадарках на 499,8 тыс. га (33% ад плана), або на 89% да аналагічнай даты мінулага года. “Пры існуючых тэмпах сяўбы на яе завяршэнне ў сярэднім па краіне спатрэбіцца яшчэ больш за 23 дні, а ў Віцебскай, Гомельскай і Магілёўскай абласцях — больш за 30 дзён, што не дазволіць правесці сяўбу азімых збожжавых культур у аптымальныя тэрміны (у паўночных рэгіёнах да 25 верасня, а ў паўднёвых — да 5 кастрычніка)”, — паведамляў Наркевіч.
Сітуацыю, якая склалася, ён тлумачыў “прастоямі тэхнікі <…> праз недахоп механізатараў, а таксама яе няспраўнасцю”.
Факты негатоўнасці тэхнікі да палявых работ КДК выявіў у 10 правераных арганізацыях, адсутнасць механізатараў — у трох.
18 ліпеня падчас селектарнай нарады па пытаннях уборачнай кампаніі з удзелам Лукашэнкі КДК, Генеральная пракуратура і Міністэрства ўнутраных спраў праінфармавалі, што ў некаторых рэгіёнах дрэнна падрыхтаваліся да ўборачнай: выяўленыя няспраўныя камбайны і зернесушыльныя комплексы, частка адрамантаваных камбайнаў не прайшла дзяржтэхагляд.
Прагучала інфармацыя аб тым, што збожжаўборачныя камбайны не гатовыя да працы практычна ў кожнай трэцяй з правераных гаспадарак, у асобных арганізацыях да рамонту не прыступалі “праз адсутнасць запасных частак і механізатарскіх кадраў”, “не падрыхтаваныя склады для прыёмкі ўраджаю”.
Сельскае насельніцтва ў Беларусі няўхільна скарачаецца ў часы кіравання Лукашэнкі.
