Белстат: Замежныя інвестыцыі ў рэальны сектар эканомікі павялічыліся на 1,85%

13 лістапада, Позірк. За тры кварталы 2025 года замежныя інвестары ўклалі ў рэальны сектар эканомікі Беларусі 5,5 млрд долараў — на 1,85% больш, чым у студзені — верасні 2024-га (5,4 млрд), сведчаць звесткі Нацыянальнага статыстычнага камітэта.

Прамыя замежныя інвестыцыі склалі 3,9 млрд долараў (4 млрд; -2,5%).

У сваю чаргу Беларусь інвеставала за мяжу 4 млрд долараў (3,6 млрд; +11,1%).

Белстат не называе канкрэтныя краіны, з якіх і ў якія паступілі інвестыцыі.

Статыстычнае ведамства падкрэсліла, што ў прыведзеных даных не ўлічваюцца інвестыцыі ў банкі, нябанкаўскія крэдытна-фінансавыя арганізацыі, Банк развіцця, бюджэтныя арганізацыі.

За 2024 год замежныя інвестары ўклалі ў рэальны сектар эканомікі Беларусі 6,9 млрд долараў — на 10,4% менш, чым у 2023-м (7,7 млрд).

У выглядзе прамых замежных інвестыцый (74,8% усяго аб’ёму) паступіла 5,2 млрд долараў (5,8 млрд; -10,3%).

Інвестыцыі з Беларусі за мяжу склалі 4,9 млрд долараў (5,7 млрд; -14%). На долю прамых інвестыцый прыйшлося 80,8% усіх накіраваных за мяжу інвестыцый.

Раней паведамлялася, што замежныя інвестыцыі ў асноўны капітал эканомікі Беларусі за пяць гадоў зменшыліся на 32,9% (з 781 млн 458 тыс.рублёў за першае паўгоддзе 2024 года да 524 млн 264 тыс. за аналагічны перыяд 2025-га).

Замежныя інвестыцыі без крэдытаў (пазык) замежных банкаў павялічыліся на 32,4% (з 345 млн 875 тыс. да 457 млн 802 тыс.).

Сума крэдытаў (пазык) замежных банкаў стала меншай на 33,2% (з 85,51 млн да 57 млн 125 тыс.).

Крэдыты па замежных крэдытных лініях зменшыліся ў 37,5 раза (з 350 млн 73 тыс.да 9 млн 337 тыс.).