Ціханоўскай уручана прэмія Магніцкага ў галіне правоў чалавека

14 лістапада, Позірк. Прэмія Магніцкага ў галіне правоў чалавека ўручаная Святлане Ціханоўскай увечары 13 лістапада ў Лондане.

Узнагарода прысвоена ёй у намінацыі “Выбітны апазіцыйны палітык”.

Прэмія была заснаваная ў 2015 годзе кіраўніком інвестыцыйнага фонду Hermitage, брытанскім бізнесменам Білам Браўдэрам у гонар расійскага юрыста Сяргея Магніцкага, які памёр у маскоўскім СІЗА “Матроская цішыня“ ў 2009 годзе ва ўзросце 37 гадоў. Магніцкі быў арыштаваны пасля ўскрыцця ім маштабных крадзяжоў бюджэтных сродкаў чыноўнікамі і супрацоўнікамі сілавых структур РФ.

У выступе на цырымоніі Ціханоўская прызналася, што адчувае сіндром самазванкі, калі бачыць побач са сваім імем словы “выбітны палітык“. “Выпадковы” — было б дакладней. У душы я перш за ўсё маці і клапатлівая жонка”, — сказала яна.

Дэмлідар назвала вялікім гонарам атрымаць прэмію і падзяліць яе з мужам Сяргеем Ціханоўскім, які таксама стаў яе лаўрэатам. Яна прысвяціла ўзнагароду “ўсім тым, хто, як і сам Сяргей Магніцкі, пакутаваў за кратамі, але не змірыўся з несправядлівасцю“: праваабаронцу, лаўрэату Нобелеўскай прэміі міру Алесю Бяляцкаму, журналістам Кацярыне Андрэевай (Бахвалавай) і Анджэю Пачобуту, прадстаўніку свайго перадвыбарчага штаба ў 2020 годзе Марыі Калеснікавай, палітыку Мікалаю Статкевічу, які “адмовіўся ад незаконнай дэпартацыі і быў зноў выкрадзены паслугачамі Лукашэнкі“ (сёлета 11 верасня адмовіўся ехаць у Літву пасля вызвалення ў рамках дамоўленасцяў Вашынгтона і Мінска).

Паводле слоў Ціханоўскай, узнагарода таксама прысвечаная ўсім палітвязням, якія былі ўзятыя ў закладнікі за сваю любоў да краіны і свабоды, і тым, хто аддаў жыццё за свабоду Беларусі і Украіны.

Сяргей Ціханоўскі на цырымонію не трапіў праз адсутнасць брытанскай візы.

У дзень мерапрыемства ён заявіў, што даведаўся пра ўручэнне прэміі “толькі напярэдадні з сацсеткі X“ і не змог своечасова атрымаць брытанскую візу ў Вільнюсе. “Арганізатары прэміі былі ўпэўненыя, што я ведаю і змагу прысутнічаць. Самі яны са мной не звязваліся, бо памылкова лічылі, што офіс Святланы Ціханоўскай паведаміць мяне пра гэта. Гэта зразумела — ні адзін чалавек у здаровым розуме не можа выказаць здагадку, што магчымая сітуацыя, у якой мне не перададуць такую інфармацыю. Аднак я са шкадаваннем вымушаны канстатаваць, што атмасферу ў офісе цяжка назваць разумнай“, — заявіў Ціханоўскі.

Ён падкрэсліў, што не мае дачынення да офіса Ціханоўскай, і папрасіў звяртацца да яго наўпрост, калі ў кагосьці ёсць жаданне кудысьці запрасіць, узяць інтэрв’ю, прапанаваць супрацоўніцтва.

Прадстаўнік офіса, прэс-сакратар Ціханоўскай Ганна Красуліна ў адказ заявіла, што Ціханоўскаму раілі падавацца на візу загадзя, бо была папярэдняя інфармацыя, што ён можа стаць лаўрэатам. “Дапамаглі яму запісацца два месяцы таму. Ён запоўніў дакументы, віза была аплачаная, але, на жаль, ён так і не падаўся на здачу біяметрыі, нягледзячы на напаміны з нашага боку. Мы з разуменнем ставімся да складанага графіку Сяргея, аднак у нас няма магчымасці паскорыць атрыманне брытанскай візы“, — падкрэсліла Красуліна.