Беларусь пірацкімі і тэрарыстычнымі метадамі бярэ ў закладнікі маёмасць перавозчыкаў — дарадца прэм’ер-міністра Літвы

14 лістапада, Позірк. “Замест таго, каб спыніць паветраную кантрабанду, якая ўяўляе пагрозу грамадзянскай авіяцыі”, Беларусь “пагаршае канфлікт і пірацкімі і тэрарыстычнымі метадамі бярэ ў закладнікі маёмасць нашых і еўрапейскіх перавозчыкаў“. Такую заяву зрабіў дарадца прэм’ер-міністра Літвы Ігнас Дабравольскас.

“Яшчэ раз можам акцэнтаваць, што КПП закрытыя праз гібрыдную атаку Беларусі супраць Літвы“, — цытуе Дабравольскаса Delfi.

Паводле яго слоў, літоўскім служачым дадзеныя “ясныя інструкцыі”. “Яны ведаюць, што Беларусь неадкладна павінна распачаць, каб Літва абмеркавала адкрыццё межаў. І, нягледзячы на пазітыўныя знакі (пасля закрыцця мяжы метэазондаў стала менш), Беларусь павінна неадкладна дазволіць нашым фурам выехаць без якіх-небудзь дадатковых санкцый“, — падкрэсліў ён.

Каментуючы заяву польскіх чыноўнікаў аб намеры з 17 лістапада адкрыць мяжу з Беларуссю, Дабравольскас адзначыў, што “апошняя інфармацыя яшчэ раз пацвярджае, што беларускі рэжым толькі імітуе жаданне вырашаць праблемы нашых і еўрапейскіх перавозчыкаў, якія апынуліся ў закладніках“.

“Мы можам падзякаваць партнёрам у Польшчы, што яны не адкрывалі КПП даўжэй, чым планавалася, было б наіўным не звязваць з гэтай прапановай рэжыму адкласці тэхнічнае развязанне праблем нашых перавозчыкаў да аўторка (18 лістапада. — “Позірк”.)”, — адзначыў дарадца.

У канцы кастрычніка Літва сутыкнулася з неаднаразовым масавым прылётам з Беларусі паветраных шароў і метэазондаў, якія выкарыстоўваюць кантрабандысты для перакідання цыгарэт. Рэагуючы на гэта, Вільнюс некалькі разоў часова закрываў пункты пропуску, а 29 кастрычніка літоўскі ўрад вырашыў закрыць іх на больш працяглы тэрмін — да 24:00 30 лістапада (1:00 1 снежня па мінскім часе) з магчымасцю падаўжэння.

У адказ урад Беларусі 31 кастрычніка прыняў пастанову № 599 “Аб прымяненні спецыяльнай абмежавальнай меры”, якой забараніў зарэгістраваным у Літве грузавым аўтамабілям, цягачам, прычэпам і паўпрычэпам праязджаць праз усе пункты пропуску, за выключэннем літоўскіх.

Праз узмацненне жорсткасці правілаў перасячэння мяжы ў Беларусі затрымалася, паводле апошніх звестак, 1.243 літоўскія фуры. Улады ў Вільнюсе спрабуюць угаварыць рэжым Лукашэнкі дазволіць грузавікам вярнуцца на літоўскую тэрыторыю праз “эвакуацыйны калідор“, Мінск адмаўляецца да адкрыцця мяжы з боку Літвы.

Пакуль сітуацыя не вырашаная, беларускія ўлады распарадзіліся змясціць згаданыя літоўскія грузавікі на стаянкі каля пунктаў пропуску і арганізаваць ахову транспарту — платную. Пры гэтым кіроўцы вольныя вярнуцца ў Літву.

11 лістапада Аляксандр Лукашэнка даручыў міністру замежных спраў Максіму Рыжанкову арганізаваць перамовы па пытаннях “нармалізацыі сітуацыі і аднаўлення паўнавартаснага функцыянавання пунктаў пропуску“ на беларуска-літоўскай мяжы. Паводле сцвярджэння Лукашэнкі, ад літоўскіх уладаў паступілі прапановы аб урэгуляванні сітуацыі.

Паведамлялася, што перамовы беларускі бок мае намер правесці з “літоўскімі ўпаўнаважанымі асобамі, адказнымі за гэты кірунак“. Каардынацыя перамоў даручана дзяржсакратару Савета бяспекі Аляксандру Вальфовічу.

12 лістапада кіраўнік Дзяржпагранкамітэта Канстанцін Моластаў паведаміў, што літоўскі бок “неаднаразова выходзіў з прапановамі аб часовым аднаўленні работы пунктаў пропуску праз дзяржаўную мяжу на розных умовах“. “Відавочна, што сітуацыя, якая склалася, выходзіць за рамкі паўнамоцтваў памежных ведамстваў абедзвюх краін і гэта пытанне патрабуе дазволу на высокім дзяржаўным узроўні“, — лічыць ён.

Прэм’ер-міністр Літва Інга Ругінене 12 лістапада пацвердзіла атрыманне афіцыйнай прапановы Мінска аб правядзенні перамоваў аб урэгуляванні сітуацыі на мяжы. “Атрыманы ліст аб пачатку перамоваў. Мы яго вывучым і прымем адпаведныя рашэнні“, — сказала яна.

Раней у той жа дзень міністр унутраных спраў Літвы Уладзіслаў Кандратовіч заявіў, што можна “паспрабаваць урэгуляваць сітуацыю на непалітычным узроўні”, на ўзроўні памежнікаў. “Што тычыцца мяжы, то, падобна, мы ўжо бачым пэўныя рухі з боку Беларусі“, — дадаў ён.

Супраць перамоваў “на ўмовах Мінска” паслядоўна выступае міністр замежных спраў Літвы Кястуціс Будрыс.