Улады выключылі з пераліку радыяцыйна небяспечных земляў больш за 875 га ў Гомельскай вобласці
25 лістапада, Позірк. Са спісу радыяцыйна небяспечных земляў выведзена агулам 875,1454 гектара ў трох раёнах Гомельскай вобласці, вынікае з пастановы Савета міністраў № 665 ад 22 лістапада 2025 года.
Згодна з дакументам, апублікаваным 26 лістапада на Нацыянальным прававым інтэрнэт-партале, адпаведныя зямельныя ўчасткі павінны быць перададзеныя ў гаспадарчае выкарыстанне — пераважна сельскагаспадарчым прадпрыемствам.
У Веткаўскім раёне адна арганізацыя — камунальнае сельскагаспадарчае унітарнае прадпрыемства “Цяплічнае” — атрымае 266,8916 га земляў, выведзеных са спісу радыяцыйна небяспечных.
У Чачэрскім раёне дзве такія арганізацыі. Гэта ААТ “Вазнясенск” (вытворчасць малака, вырошчванне маладняку буйной рагатай жывёлы, вытворчасць збожжавых культур, кармоў) — 33,8405 га зямель, а таксама ААТ “Звязда” — 61,8007 га.
У Жлобінскім раёне ўчасткі атрымаюць ААТ “Мармоль” (вытворчасць гатовых кармоў, развядзенне буйной рагатай жывёлы, вырошчванне збожжавых і алейных культур) — 230,0827 га; ААТ “Бабоўскі” (вытворчасць малака, мяса, збожжавых культур, кукурузы і рапсу) — 84,9088 га; сельскагаспадарчае унітарнае прадпрыемства “Стэпы” — 88,3741; ААТ “Жлобінскі Агратэхсэрвіс” (рамонт сельгастэхнікі) — 16,1526; вытворчае унітарнае прадпрыемства “Гомельаблгаз” — 93,0944.
Агульная плошча ўчасткаў, выведзеных згаданай пастановай урада са спісу радыяцыйна небяспечных земляў, параўнальная з плошчай Полацка.
Райвыканкамам даручана ў месячны тэрмін вызначыць межы зямельных участкаў і перадаць іх названым прадпрыемствам для далейшага выкарыстання. Мясцовыя ўлады таксама маюць змяніць зямельна-кадастравую дакументацыю, забяспечыць кантроль умоў па выкарыстанні зямлі ў адпаведнасці з экспертным заключэннем Міністэрства сельскай гаспадаркі і харчавання, а таксама кантроль радыеактыўнага забруджвання прадукцыі, што вырабляецца на гэтых участках.
Гэтым жа дакументам Савет міністраў змяніў дадатак да сваёй пастановы № 158 ад 7 сакавіка 2024 года, у якой вызначаны склад камісіі па выбары прыярытэтнай пляцоўкі для збудавання пункта пахавання радыеактыўных адкідаў. Сёлета ў верасні арганізацыя BelPol, спасылаючыся на атрыманы ёю дакумент, паведамляла, што гэты пункт плануецца размясціць ля Беларускай АЭС.
26 красавіка 1986 года адбылася найбуйнейшая ў гісторыі чалавецтва тэхнагенная катастрофа — аварыя на Чарнобыльскай атамнай электрастанцыі. Нягледзячы на тое, што АЭС месціцца ва Украіне, больш за 70% радыенуклідаў, якія вызваліліся ў выніку разбурэння рэактара чацвёртага энергаблока, асела ў Беларусі.
Паводле даных Дэпартамента па ядзернай і радыяцыйнай бяспецы МНС (Дзяржатамнагляд), на 1 студзеня 2025 года ў зонах радыеактыўнага забруджвання пражывала больш за 930 тыс. чалавек, у тым ліку 181 тыс. дзяцей.
На забруджаных тэрыторыях знаходзіцца каля 2 тыс. населеных пунктаў. Забруджанымі застаецца каля 25 тыс. квадратных кіламетраў — прыкладна 12% тэрыторыі краіны.
