Мытня канфіскавала на мяжы 1 кг мефедрону і звыш 3,2 тыс. наркатычных таблетак — іх увозілі з Польшчы ў музычных калонках

26 лістапада, Позірк. “Больш за 1 кг мефедрону і звыш 3,2 тыс. таблетак з наркотыкам” канфіскаваныя пры ўвозе на мяжы з Польшчай, паведамляе Дзяржаўны мытны камітэт (ДМК).

Адзначаецца, што груз знойдзены ў музычных калонках, ён увозіўся “для далейшай рэалізацыі ў Беларусі і Расіі”.

ДМК паведамляе аб устанаўленні сумесна з Федэральнай мытнай службай Расіі “ланцужкі злачынцаў”: “На расійскай тэрыторыі затрыманыя арганізатары схемы, якія чакалі пастаўку рэчываў з Еўрасаюзу”.

Адным з удзельнікаў злачыннай схемы называецца 25-гадовы кіроўца пасажырскага аўтобуса “Мэрсэдэс”, які прыбыў з Польшчы ў пункт пропуску Брэст (з сумежнага боку Цярэспаль). “У мытнай дэкларацыі беларус указаў б/в рэчы і пакупкі, заявіў аб адсутнасці ў яго тавараў, забароненых альбо абмежаваных да перамяшчэння”, — гаворыцца ў паведамленні.

Аднак, як заяўляецца, “у мытніка выклікала падазрэнне музычная калонка мужчыны”. Пасля праверкі з яе быў выняты “скрутак у поліэтыленавай плёнцы з больш чым 1 кг белага крышталічнага рэчыва, прысыпанага кававымі зернямі”.

Судовая экспертыза пацвердзіла, што гэта — “асабліва небяспечнае псіхатропнае рэчыва мефедрон”, адзначае ДМК.

Яшчэ адным удзельнікам злачыннай схемы з’яўляецца кіроўца легкавога аўто “Сеат”, які, заязджаючы ў Беларусь праз гэты ж пункт пропуску, падаў дэкларацыю на “б/в кавамашыну”. Пры аглядзе яго аўтамабіля мытнікі таксама вырашылі праверыць музычную калонку — у выніку з яе вынята “16 палімерных пакетаў з больш чым 3,2 тыс. таблетак “Субутэкс” (адносіцца да паўсінтэтычных апіоідаў. — “Позірк”.).

Распачатыя крымінальныя справы паводле ч. 2 арт. 3281 КК (незаконнае перамяшчэнне праз мытную мяжу Еўразійскага эканамічнага саюза або дзяржаўную мяжу Рэспублікі Беларусь наркатычных сродкаў, псіхатропных рэчываў альбо іх прэкурсораў або аналагаў). Паводле аналагічнага артыкула распачатая крымінальная вытворчасць і расійскай мытнай службай.

Паводле ўказанага артыкула КК Беларусі прадугледжана пакаранне ў выглядзе пазбаўлення волі да 20 гадоў.

28 жніўня Дзяржаўны мытны камітэт паведамляў аб спыненні буйнога міжнароднага канала пастаўкі асабліва небяспечных псіхатропных рэчываў: псіхатроп 4-СМС пастаўляўся з тэрыторыі Еўрасаюза ў Расію, было канфіскавана больш за 637 кг рэчыва. Затрыманыя датычныя да злачынства грамадзяне Літвы, Беларусі, Расіі і Украіны.

25 ліпеня Следчы камітэт паведаміў пра “высвятленне акалічнасцяў пастаўкі наркотыкаў з краін Еўрасаюзу ў Расію транзітам праз Беларусь”. Заяўлялася ў рамках стрымання “наркатрафіку з ЕС” аб канфіскацыі больш за 1,5 тоны забароненых рэчываў.

2 ліпеня ДМК паведаміў аб спыненні канала пастаўкі з Расіі ў Беларусь “асабліва небяспечных псіхатропных рэчываў”. Наркакур’ераў — 50-гадовую жыхарку Гродна і 63-гадовага жыхара Мінскага раёна — затрымалі пад Полацкам (Віцебская вобласць) пры правядзенні аператыўна-вышуковых мерапрыемстваў “пры сілавой падтрымцы байцоў спецпадраздзялення “Алмаз”. У дачыненні да затрыманых распачатая крымінальная справа, ім пагражае да 15 гадоў пазбаўлення волі.

6 траўня ў Мінску завяршыўся “комплекс мерапрыемстваў аператыўных супрацоўнікаў органаў пагранічнай службы па затрыманні ўдзельнікаў злачыннай групы”, у выніку чаго было затрымана двое беларускіх грамадзян, якія працавалі на інтэрнэт-краму, у чые абавязкі ўваходзіла перамяшчаць з тэрыторыі Расіі і распаўсюджваць псіхатропныя рэчывы.

2 ліпеня МУС паведаміла, што з пачатку 2025 года на тэрыторыі Беларусі спынена дзейнасць 22 інтэрнэт-наркамаркетаў, перакрытыя 24 каналы паступлення забароненых рэчываў, “за збыт дурману ў інтарэсах гандлёвых пляцовак затрыманыя звыш 500 чалавек”.

Паводле даных ДМК, у 2024 годзе канфіскавана 1.622 тоны наркатычных сродкаў і псіхатропных рэчываў — амаль у два разы больш, чым за папярэдні год. Зафіксаваныя 553 факты кантрабанды і незаконнага абароту наркотыкаў, узбуджана 310 крымінальных спраў — на 13% больш, чым у 2023-м.

У 2024 годзе з незаконнага абароту было выключана амаль дзве тоны наркотыкаў, псіхатропаў і іх прэкурсораў. Канфіскаваная колькасць наркотыкаў у два разы большая, чым годам раней, паведаміў міністр унутраных спраў Іван Кубракоў. Раней ён заявіў, што ў 2023 годзе было канфіскавана больш за тону наркотыкаў, што амаль у 6 разоў больш, чым у 2022-м.

У лістападзе мінулага года аб’яднанне BelPol на аснове аналітычнай даведкі МУС, якая патрапіла ў яго распараджэнне, паведаміла, што галоўным пастаўшчыком наркотыкаў і псіхатропаў у Беларусь з’яўляецца Расія. З дакумента вынікала, што ў першай палове 2024 года ў Беларусі было выяўлена 17 каналаў паставак забароненых рэчываў: у 14 выпадках (82,4%) наркотыкі і псіхатропы паступалі з Расіі, у двух — з Польшчы, у адным — з Літвы.