Літоўскія памежнікі затрымалі 35-гадовага грамадзяніна Беларусі, якога вышуквалі ў Германіі

29 лістапада, Позірк. Пра затрыманне грамадзяніна Беларусі, а таксама расійскага грамадзяніна, якіх вышукваюць праваахоўныя органы краін Еўрасаюза, адсправаздачылася 29 лістапада Служба аховы дзяржаўнай мяжы (САДМ) Літвы.

Паводле інфармацыі ведамства, позна ўвечары 27 лістапада памежнікі ў пункце пропуску Мядзінінкай (з беларускага боку — Каменны Лог) пры праверцы аўтобуса, які рухаўся з Каўнаса ў Мінск, выявілі, што аднаго з пасажыраў, 26-гадовага грамадзяніна РФ, з чэрвеня 2021 года шукаюць іспанскія праваахоўнікі. Пасля высветлілася, што ён таксама фігуруе ў базе вышуку Інтэрпола — з ініцыятывы літоўскай паліцыі.

“Памежнікі дбайна праверылі рэчы шуканага. У дарожнай валізцы былі адзенне, заплечнік з кампутарам і мабільным тэлефонам, а таксама амаль 4 тыс. еўра наяўнымі. Расійскі грамадзянін спрабаваў звязацца з сябрамі з нагоды свайго затрымання. У чаканні прыбыцця паліцэйскага канвою расіянін знаходзіўся ў камеры часовага ўтрымання пад сталым назіраннем”, — гаворыцца ў паведамленні.

Праз некалькі гадзін у тым жа пункце пропуску памежнікі, правяраючы зарэгістраваны ў РФ аўтамабіль, звярнулі ўвагу на аднаго з пасажыраў — 35-гадовага грамадзяніна Беларусі з шэнгенскай візай, выдадзенай Польшчай. “Супрацоўнікі САДМ высветлілі, што месяц таму, 23 кастрычніка, на гэтага мужчыну быў выдадзены еўрапейскі ордар на арышт, ініцыятар — Германія”, — заявіла ведамства.

Паведамляецца, што кіроўцу — грамадзяніну РФ і другому пасажыру з беларускім грамадзянствам “дазволілі працягнуць паездку”. Затрыманага ж беларуса змясцілі ў камеру часовага ўтрымання.

“Пры дбайнай праверцы рэчаў затрыманага ў заплечніку былі знойдзеныя кампутар, мабільны тэлефон і больш за 6 тыс. еўра наяўнымі. Затрыманага грамадзяніна Беларусі праз гадзіну перадалі супрацоўнікам паліцыі сталіцы, якія прыбылі ў пункт Мядзінінкай”, — адзначыла САДМ.

Паводле даных ведамства, ад пачатку 2025 года памежнікі затрымалі 749 асоб, якіх літоўскія ці замежныя праваахоўнікі шукалі за розныя злачынствы ці парушэнні. Разам з тым колькасць грамадзян Беларусі, якія фігуруюць у гэтым спісе, — 12 — засталася нязменнай у параўнанні з данымі за 20 лістапада, нягледзячы на ​​апошняе затрыманне.