29 лістапада, Позірк. Колькасць грамадзян Беларусі, зарэгістраваных у сістэме сацыяльнага страхавання Польшчы (ZUS) для пенсіі і на выпадак інваліднасці, за 21 месяц павялічылася на 9.322 (+7,22%) — з 129.122 на 31 студзеня 2024 года да 138.444 на 31 кастрычніка 2025-га, сведчыць праведзены “Позіркам” аналіз даных ZUS.
Паводле інфармацыі прэс-службы Аб’яднанага пераходнага кабінета (АПК), 28 лістапада ў Варшаве адбылася інфармацыйная імпрэза для беларускіх грамадзян, якія пражываюць у Польшчы, прысвечаная пытанням пенсіі і сацыяльных выплат. На сустрэчы, ініцыяванай намеснікам кіраўніцы АПК, кіраўніком Народнага антыкрызіснага ўпраўлення (НАУ) Паўлам Латушкам і арганізаванай НАУ сумесна з ZUS і Міністэрствам сям’і, працы і сацпалітыкі Польшчы, сабралася некалькі дзясяткаў беларусаў. Тыя, хто не змог прысутнічаць, даслалі дзясяткі пытанняў па тэме.
Прадстаўнікі ZUS сярод іншага распавялі прысутным, што для атрымання статусу пенсіянера ў Польшчы трэба хаця б адзін раз зрабіць страхавы ўнёсак; што пенсія прызначаецца пры дасягненні вызначанага польскім заканадаўствам узросту (для жанчын — 60, мужчын — 65), нават калі ў Беларусі чалавек ужо быў прызнаны пенсіянерам; што на перавод беларускай пенсіі на польскі рахунак могуць прэтэндаваць толькі грамадзяне, якія стала жывуць у Польшчы, ды інш.
Паводле даных Парламенцкай асамблеі Савета Еўропы, ад 200 да 500 тыс. чалавек пакінула Беларусь пасля падзей жніўня 2020 года. Упраўленне вярхоўнага камісара ААН па правах чалавека называла меншую лічбу — 100 тыс. У лютаўскім дакладзе Групы незалежных экспертаў ААН па становішчы ў галіне правоў чалавека ў Беларусі гаварылася, што з краіны за гэты час магло з’ехаць да 600 тыс. грамадзян.
Падрабязнасці дастуаныя падпісчыкам “Позірк+”
