З 2020 года сама меней 9.185 чалавек зазнала палітычны крымінальны пераслед, асуджана звыш 85% — “Вясна”

6 снежня, Позірк. Сама меней 9.185 чалавек зазнала палітычны крымінальны пераслед у Беларусі з 2020 года, гаворыцца ў падрыхтаванай праваабарончым цэнтрам “Вясна” справаздачы пра сітуацыю з правамі чалавека за лістапад 2025-га.

Адзначаецца, што ў дачыненні да 7.840 як найменей вынесеныя палітычна матываваныя выракі (з улікам 37 накіраваных на прымусовае псіхіятрычнае лячэнне). Такім чынам асуджана мінімум 85,4% асоб, што трапілі пад такі пераслед.

За лістапад праваабаронцы прызналі палітвязнямі 33 чалавекі, агульная колькасць на канец месяца склала 1.222 (сярод іх 199 жанчын). “Агулам з траўня 2020 года рашэнні пра прызнанне палітвязнямі прымаліся ў дачыненні да 4.288 чалавек, — гаворыцца ў дакуменце. — 3.066 чалавек, з якіх 623 жанчыны, ужо знаходзяцца на волі ў сувязі з адбыццём тэрміну, вызваленнем ад пакарання або ў сувязі са зменай меры стрымання”.

На 4 лістапада праваабаронцам было вядома як найменей пра 182 палітвязні ў “асабліва ўразлівым становішчы, несумяшчальным са знаходжаннем у няволі”. Сярод іх людзі з цяжкімі захворваннямі (66), шматдзетныя, асобы “з сямейнымі цяжкасцямі або на прымусовым псіхіятрычным лячэнні”.

“Таксама ў гэтую колькасць уваходзяць палітвязні, якія дыскрымінуюцца па розных падставах: знаходзяцца ў стане інкамунікада, не выходзяць з-за кратаў, нават нягледзячы на тое, што першапачатковы тэрмін іх пакарання скончыўся”, — адзначана ў справаздачы.