9 снежня, Позірк. Беларусь на 4-м месцы ў свеце паводле колькасці зняволеных журналістаў, сведчыць выніковы даклад праваабарончай арганізацыі “Рэпарцёры без межаў” за 2025 год.
Паводле даных арганізацыі, у Беларусі пазбаўленыя волі 33 прадстаўнікі СМІ (Беларуская асацыяцыя журналістаў кажа пра 28).
На 1 снежня ў 47 краінах свету 503 журналісты знаходзіліся ў няволі. У тройцы лідараў “краін — турмаў для журналістаў” Кітай (121), Расія (48) і М’янма (47).
“Рэпарцёры без межаў” адзначаюць, што сітуацыя ў Расіі, Грузіі, Азербайджане, Беларусі з’яўляецца “нагляднай ілюстрацыяй сур’ёзнай небяспекі для свабоды прэсы ў краінах былога СССР”.
Адзначаецца, што ў 2025 годзе па ўсім свеце загінула 67 журналістаў. З іх сама меней 53 сталі ахвярамі вайны або арганізаванай злачыннасці.
Падчас і пасля падзей 2020 года беларускія ўлады практычна цалкам “зачысцілі” медыйную прастору краіны, у якой засталіся пераважна дзяржаўныя і лаяльныя да рэжыму Аляксандра Лукашэнкі СМІ.
Частка медыя спыніла існаванне, частка працягвае дзейнасць за мяжой. Большасць рэлакаваных рэдакцый атрымала ў Беларусі статус “экстрэмісцкіх” фарміраванняў або арганізацый.
У звароце да пятай гадавіны сфальсіфікаваных прэзідэнцкіх выбараў 2020 года ў Беларусі Міжнародная федэрацыя журналістаў заявіла, што “абмежаванне свабоды слова і разбурэнне незалежнай журналістыкі” пры рэжыме Лукашэнкі “фактычна пазбавілі журналістаў магчымасці займацца сваёй справай у любой форме”, пераслед журналістаў за ажыццяўленне імі прафесійнай дзейнасці стаў “звычайнай з’явай”.
