Былы фігурант “справы Белага легіёну” Сяргей Стрыбульскі затрыманы ў рамках крымінальнай справы

Апублікавана на адкрытай версіі “Позірку” 20 лістапада 2025 года ў 19:05

20 снежня, Позірк. Былы фігурант “справы Белага легіёну» Сяргей Стрыбульскі затрыманы ў рамках крымінальнай справы, паведаміла “Позірку” абазнаная крыніца.

“Сяргея затрымалі яшчэ 14 лістапада, ён адсядзеў два адміністрацыйных тэрміны. А з 12 снежня яго затрымалі па крымінальнай справе”, — заявіў суразмоўца.

Паводле яе звестак, цяпер Стрыбульскі знаходзіцца ў турме № 4 у Магілёве (частка пенітэнцыярнай установы выкарыстоўваецца ў якасці следчага ізалятара). Мужчыну, наколькі вядома крыніцы, выстаўленае абвінавачання паводле ч. 1 арт. 361⁴ КК (вярбоўка, іншае ўцягванне асобы ў экстрэмісцкую дзейнасць, навучанне, а таксама іншае садзейнічанне экстрэмісцкай дзейнасці).

У 2017 годзе Стрыбульскага затрымлівалі ў рамках гучнай “справы Белага легіёну”. Ён быў вызвалены пасля 99 дзён за кратамі — справу закрылі праз адсутнасць складу злачынства.

Мужчына таксама быў затрыманы ўвосені 2021 года, тады ў яго канфіскавалі тэхніку і “пратэстную сімволіку”.

У 2022-м, паводле інфармацыі праваабарончага цэнтра “Вясна”, Стрыбульскага затрымалі 23 сакавіка — незадоўга да Дня Волі (25 сакавіка). На наступны дзень пасля затрымання ён быў арыштаваны на 15 сутак. Пасля мужчына распавёў сябрам, што пры затрыманні яго збівалі, фактычна катавалі токам.