У Вільнюсе зноў апаганены мемарыял ахвярам палітычных рэпрэсій у Беларусі

22 снежня, Позірк. Невядомы апаганіў мемарыял ахвярам палітычных рэпрэсій у Беларусі каля беларускай амбасады ў Вільнюсе, паведамляе партал Delfi.

Паводле звестак паліцыі, 21 снежня ля плота беларускай амбасады “нейкі чалавек разбіў шкло на партрэтах чатырох загінулых, перавярнуў фатаграфіі і разбіў свечкі”. Інцыдэнт адбыўся ў перыяд з 14.00 да 18.50 гадзін.

Паліцыя расследуе “факт парушэння грамадскага парадку”, гаворыцца ў публікацыі.

Гэта не першае апаганьванне мемарыяла ў Вільнюсе.

У кастрычніку 2020 года мемарыял спрабаваў разбурыць вільнюскі блогер Лаўрынас Рагельскіс, які прытрымліваецца прарасійскіх поглядаў. У дачыненні да яго была распачатая справа аб “распальванні варожасці” і “апаганьванні памятнага месца”.

26 жніўня 2023 года СМІ паведамілі аб частковым разбурэнні мемарыяла невядомымі. Прадстаўнікі беларускай дыяспары ў Літве ў той жа дзень аднавілі мемарыял.

У траўні 2024 года мемарыял зноў быў часткова разбураны.

Мемарыял “Вахта святла” размешчаны каля будынка амбасады Беларусі і ўяўляе сабой галерэю з партрэтамі людзей — ахвяр рэпрэсій рэжыму Аляксандра Лукашэнкі, а таксама беларускіх добраахвотнікаў, якія загінулі ва Украіне.