Планы дэмсіл на правядзенне круглага стала з уладай не спраўдзяцца — Церцель

24 снежня, Позірк. Планы апанентаў па правядзенні круглага стала з прадстаўнікамі ўлады не спраўдзяцца, заявіў старшыня Камітэта дзяржаўнай бяспекі Іван Церцель дзяржСМІ 24 снежня.

“Ёсць пэўныя трэнды, якія цяпер спрабуюць рэалізоўваць. У прыватнасці, гэта імкненне да нашай моладзі, гэта імкненне да нашага дзяржапарату і рэалізацыя сцэнарыя так званага круглага стала. Запэўніваем вас, што гэтыя планы не спраўдзяцца і ў гэтых адносінах як знешняя разведка, так і іншыя падраздзяленні КДБ працуюць, каб сцэнар, падобны на ўкраінскі, не быў рэалізаваны”, — падкрэсліў кіраўнік спецслужбы (паводле відэа, распаўсюджанага агенцтвам БелТА).

“Доўгатэрміновыя планы праціўнікаў”, паводле яго сцвярджэння, не памяняліся: “Асноўнае — гэта, вядома, геапалітычны перадзел у рэгіёне. Спадарожныя мэты — гэта змена канстытуцыйнага ладу ў Беларусі”.

“Мы канстатуем, што тыя падрыўныя цэнтры, якія знаходзяцца ў суседніх з намі дзяржавах, паступова дэградуюць, нарошчваецца супрацьстаянне паміж асобнымі з іх”, — сказаў Церцель.

9 жніўня з ініцыятывай правесці нацыянальны дыялог для мірнага вырашэння глыбокага палітычнага і грамадскага крызісу ў Беларусі афіцыйна выступіў Аб’яднаны пераходны кабінет.

Аб намеры АПК ініцыяваць нацыянальны дыялог заявіў за дзень да гэтага намеснік кіраўніка кабінета Павел Латушка.

Пазіцыя АПК была выпрацавана 7 жніўня ў развіццё прапановы Ціханоўскай 15 ліпеня ў Бруселі на 107-м семінары Роўз-Рот, арганізаваным Парламенцкай асамблеяй НАТО ў партнёрстве з Еўрапарламентам.

22 жніўня Лукашэнка заявіў дзяржСМІ, што не бачыць сэнсу ў перамовах з апанентамі.