Нормы аховы працы плануецца распаўсюдзіць на тых, хто працуе дыстанцыйна
25 снежня, Позірк. Нормы аховы працы плануецца распаўсюдзіць на працуючых дыстанцыйна. Гэта прадугледжана папраўкамі ў закон “Аб ахове працы”, якія былі абмеркаваныя 23 снежня на пасяджэнні Нацыянальнага савета па працоўных і сацыяльных пытаннях, паведамілі прэс-службы Федэрацыі прафсаюзаў (праўладная, незалежныя аб’яднанні разгромленыя) і Палаты прадстаўнікоў Нацыянальнага сходу.
“Яшчэ адна важная навацыя — цыфравізацыя многіх працэдур. Напрыклад, разам з традыцыйным фарматам прадугледжаная і магчымасць электроннага афармлення шэрагу дакументаў па ахове працы“, — адзначаецца ў рэлізе ФПБ.
Прапануецца вызначыць мінімальную працягласць дадатковых спецыяльных перапынкаў — не менш за 10 хвілін — для абагравання і адпачынку работнікаў, якія выконваюць работы ў халодны і спякотны час года на адкрытым паветры.
“Гэтае пытанне часта ўздымалася ў калектывах. Нярэдка сустракаўся ў практыцы фармальны падыход асобных наймальнікаў да прадастаўлення дадатковых перапынкаў. Часам перапынак мог складаць усяго пару хвілін, за якія работнік фізічна не мог адпачыць і аднавіцца ў перыяд экстрэмальных тэмператур. Заканадаўчае замацаванне такіх гарантый дазволіць стварыць адзіныя і абавязковыя для ўсіх наймальнікаў патрабаванні, накіраваныя на захаванне здароўя і зніжэнне прафесійных рызык“, — заявіў галоўны тэхнічны інспектар працы ФПБ Павел Манько.
Акрамя таго, у праект закона ўключаны новыя нормы аб садзейнічанні наймальніка ў навучанні і заахвочванні грамадскіх інспектараў па ахове працы, што, як мяркуецца, “надасць дадатковы імпульс развіццю грамадскага кантролю ў сферы аховы працы“.
