У Літве затрыманы беларус з партыяй кантрабандных цыгарэт на 217 тыс. еўра

3 студзеня, Позірк. У Шальчынінкаі з буйной партыяй кантрабандных цыгарэт затрыманы грамадзянін Беларусі, паведамляе мытня Літвы.

Цыгарэты былі выяўленыя пры рэнтгенаўскім кантролі мікрааўтобуса “Форд Транзіт”, на якім перасоўваўся беларус.

Адзначаецца, што транспартны сродак быў абсталяваны шматлікімі схованкамі для захоўвання кантрабанды. Яны былі размешчаныя ў падлозе, на столі, у дзвярах і сценах аўтамабіля.

Паводле слоў кіроўцы, ён хаваў цыгарэты ў схованках на працягу двух дзён.

Канфіскавана 41.900 пачкаў цыгарэт на суму больш за 217 тыс. еўра.

Паведамляецца аб пачатку дасудовага расследавання па факце кантрабанды.

Літва рэгулярна паведамляе аб прадухіленні спробаў кантрабанды цыгарэт з Беларусі. З восені 2025 года рэзка павялічылася інтэнсіўнасць нелегальнай дастаўкі тытунёвай прадукцыі з дапамогай паветраных шароў.

Паводле звестак Службы аховы дзяржаўнай мяжы (САДМ), за 2025 год Літва перахапіла 635 шароў з кантрабандай, якія заляцелі з Беларусі. Гэта ў 2,8 раза больш, чым за 2024 год, калі было перахоплена 226 такіх аэрастатаў. Адметна, што ў 2023-м іх было ўсяго тры.