У Столінскім раёне са стралянінай спынялі п’янага бяспраўніка, ён затрыманы

4 студзеня, Позірк. Нарад ДАІ ў Столінскім раёне (Брэсцкая вобласць) выкарыстаў зброю для спынення легкавога аўто.

Кіроўца ВАЗу праігнараваў сігнал міліцыі. Пачаўся пераслед.

На неаднаразовыя патрабаванні спыніцца ён не рэагаваў і спрабаваў уцячы. “Аўтамабіль віляў па праезнай частцы, ствараючы рэальную пагрозу жыццю і здароўю ўдзельнікаў дарожнага руху”, — гаворыцца ў рэлізе.

За рулём апынуўся 39-гадовы мясцовы жыхар “з відавочнымі прыкметамі ап’янення”: “Ад праходжання медыцынскага агляду ён адмовіўся. Мужчына пазбаўлены права кіравання транспартнымі сродкамі і раней неаднаразова прыцягваўся да крымінальнай адказнасці”.

У дачыненні да затрыманага складзены адміністрацыйныя пратаколы. Ён змешчаны ў ІЧУ, аўто дастаўлена на ахоўную стаянку.