Новыя праграмы ў галіне метэаралогіі ў рамках Саюзнай дзяржавы не падтрыманыя — прадстаўнік Белгідрамета

Апублікавана на адкрытай версіі “Позірку” 13 студзеня 2026 года ў 10:50

12 студзеня, Позірк. Новыя праграмы ў галіне метэаралогіі ў рамках Саюзнай дзяржавы не падтрыманыя, заявіла першы намеснік начальніка Белгідрамета Таццяна Чатырка на прэс-канферэнцыі 12 студзеня.

“Што тычыцца саюзнай праграмы (“Забеспячэнне гідраметэаралагічнай бяспекі ва ўмовах зменлівасці і змены клімату“ на 2024-2028 гады. — “Позірк“.), гэтае пытанне закраналася [1 кастрычніка 2025 года ў Віцебску] на 80-м пасяджэнні сумеснай калегіі Камітэта Саюзнай дзяржавы па гідраметэаралогіі і маніторынгу забруджвання прыроднага асяроддзя (Саюзкамгідрамет. — “Позірк“.). Таму што насамрэч рэалізацыя праграмы з усімі мерапрыемствамі, якія звычайна ў праграму закладваюцца, — гэта вялікі, скажам так, старт для развіцця гідраметслужбаў Расійскай Федэрацыі і Рэспублікі Беларусь. Ужо было рэалізавана за перыяд існавання Саюзкамгідрамета чатыры праграмы Саюзнай дзяржавы. І, на жаль, пры вялікай гатоўнасці пятай саюзнай праграмы яна падтрымана не была“, — сказала Чатырка (чацвёртая праграма была рэалізаваная ў 2017-2021 гадах. — “Позірк“.).

Акрамя таго, паводле слоў прадстаўніка Белгідрамета, у рамках СД быў падрыхтаваны праект, “які накіраваны на радыяцыйны маніторынг“. “У тым ліку ў гэтым праекце ёсць мерапрыемствы, якія нацэленыя на прагназаванне канвектыўных працэсаў, якія хутка развіваюцца ў зоне атамнай электрастанцыі. Але на сённяшні дзень, нягледзячы на тое, што праект таксама ў высокай ступені гатоўнасці, ён не быў узгоднены ў мінфінах абедзвюх дзяржаў“, — сказала Чатырка.

Даведка “Позірку“: Мова ідзе аб праекце СД “Мадэрнізацыя і развіццё сістэмы маніторынгу радыяцыйнага становішча Саюзнай дзяржавы з выкарыстаннем мабільных платформаў радыеметрычных вымярэнняў”. Ён быў разгледжаны на 79-м пасяджэнні калегіі Союзкомгидромета ў траўні 2025 года ў Валгаградзе. Калегія звярнулася ў Міністэрства прыродных рэсурсаў і аховы навакольнага асяроддзя Беларусі з просьбай “садзейнічаць у правядзенні працэдуры ўзгаднення праекта“.

“Таму пакуль мы ў чаканні <…> і ў любы перыяд гатовыя да рэалізацыі гэтых праектаў“, — падкрэсліла Чатырка.

На іншай прэс-канферэнцыі, якая адбылася ў той жа дзень, намеснік начальніка Белгідрамета Аляксандр Трусаў заявіў, што правядзенне мерапрыемстваў у рамках дакумента “Мадэрнізацыя і развіццё сістэмы маніторынгу радыяцыйнага становішча Саюзнай дзяржавы з выкарыстаннем мабільных платформаў радыеметрычных вымярэнняў” плануецца распачаць у 2027 годзе.