Кіраўнік Гомельскага гарвыканкама Прывалаў заявіў пра пачатак выплат кампенсацый жыхарам пацярпелага ад выбуху шматпавярховіка

14 студзеня, Позірк. Аб пачатку выплат грашовых кампенсацый жыхарам пацярпелага ад выбуху шматпавярховага дома ў Гомелі паведаміў 14 студзеня старшыня гарвыканкама Уладзімір Прывалаў.

Як адзначаецца ў тэлеграм-канале мясцовага аблвыканкама, памер выплат разлічаны “гомельскім агенцтвам па дзяржаўнай рэгістрацыі і зямельным кадастры”. Сцвярджаецца, што сумы, якія атрымаюць жыхары, адпавядаюць “рынкаваму кошту іх кватэр”. Лічбы не называюцца.

Таксама 14 студзеня намеснік старшыні Гомельскага аблвыканкама Андрэй Бараноўскі паведаміў, што аднаўленне пашкоджаных у выніку выбуху канструкцый дома плануецца завяршыць у траўні гэтага года.

26 снежня мінулага года Прывалаў заяўляў, што “ў якасці кампенсацыі шкоды жыхарам дома будзе выплачана не менш за 1 млн рублёў — у сярэднім па 100 тыс. на кожную сям’ю, якая часова засталася без жылля”.

24 снежня паведамлялася, што 31 жыхар пацярпелага ад выбуху дома пражывае ў гомельскай гасцініцы “Сож”.

23 снежня стала вядома аб выяўленні ў 21:30 22 снежня пад абвалам перакрыццяў двух паверхаў у доме цела загінулай у выніку выбуху жанчыны.

Пра “выбух газапаветранай сумесі” ў кватэры на 7-м паверсе 10-павярховага дома (вул. Косарава, 3) У Гомелі 17 снежня паведаміла Міністэрства па надзвычайных сітуацыях. Пазней ведамства заявіла, што ў выніку выбуху “адбылося абвальванне пліт перакрыццяў жылых пакояў з восьмага па шосты паверхі, пашкоджаная вонкавая сценавая панэль дома”.