Распачатая працэдура легалізацыі ў Польшчы 79 вывезеных экс-палітвязняў — АПК

14 студзеня, Позірк. Ва Упраўленні па справах замежнікаў Польшчы распачатая працэдура легалізацыі ў дачыненні да 79 вызваленых і вывезеных з Беларусі экс-палітвязняў, у дачыненні да яшчэ чатырох працэс пачнецца ў бліжэйшы час.

Пра гэта, паводле інфармацыі Аб’яднанага пераходнага кабінета (АПК), заявіў кіраўнік згаданага ўпраўлення Томаш Цытрыновіч на праведзенай 14 студзеня сустрэчы з намеснікам кіраўніка кабінета, кіраўніком Народнага антыкрызіснага ўпраўлення (НАУ) Паўлам Латушкам.

У сустрэчы, як паведамляецца, таксама ўзялі ўдзел юрыст НАУ, старшыня юрыдычнай камісіі Каардынацыйнай рады Міхаіл Кірылюк, прадстаўнік Цэнтра беларускай салідарнасці Вольга Дабравольская і неназваны прадстаўнік праваабарончай ініцыятывы “Partyzanka”.

Адзначаецца, што на сустрэчы Цытрыновіч запэўніў, што “польскі бок будзе прыкладаць усе намаганні для таго, каб у магчыма кароткія тэрміны, у рамках дзеючага заканадаўства Польшчы, прымаць рашэнні аб легалізацыі на тэрыторыі краіны вызваленых палітвязняў па меры завяршэння ўсіх унутраных працэдур”.

“Чакаецца, што рашэнні будуць прымацца ў бліжэйшыя месяцы”, — гаворыцца ў паведамленні.

Латушка ў сваю чаргу “падзякаваў Упраўленню па справах замежнікаў, МУС, МЗС, Галоўнай камендатуры памежнай службы Польшчы за пазітыўны падыход да пытанняў легалізацыі дэпартаваных на тэрыторыю Польшчы грамадзян Беларусі”.

Паведамляецца, што Латушка і іншыя ўдзельнікі сустрэчы “асобна ініцыявалі абмеркаванне пытання праблематыкі адкрыцця разліковых рахункаў у камерцыйных банках Польшчы для беларусаў, якія знаходзяцца ў працэдуры легалізацыі і маюць на руках часовыя пасведчанні асобы замежніка на тэрыторыі краіны”. У гэтым кантэксце кіраўнік НАУ “звярнуў увагу, што камісія фінансавага нагляду Польшчы дала вычарпальны адказ аб тым, што гэты дакумент з’яўляецца падставай для адкрыцця разліковага рахунку”.

Адзначаецца, што “ў сувязі са складанасцямі пры адкрыцці рахункаў была дасягнутая дамоўленасць аб атрыманні з боку Упраўлення па справах замежнікаў дадатковага пісьмовага пацверджання таго, што гэты дакумент з’яўляецца падставай для адкрыцця рахункаў, і далейшага выкарыстання пазіцый афіцыйных органаў Польшчы ў кантактах з камерцыйнымі банкамі для вырашэння сітуацыі, якая склалася”.

Паводле даных АПК, прадстаўнік упраўлення па справах замежнікаў адзначыў, што яго ведамства “падтрымлівае прапанову па павелічэнні тэрміну дзеяння праязнога дакумента для замежнікаў больш чым на адзін год”. У гэтай сувязі Латушка і ўдзельнікі сустрэчы адзначылі, што “рэалізацыя гэтага падыходу значна спрасціла б вырашэнне сацыяльна-бытавых і іншых пытанняў для замежнікаў на тэрыторыі Польшчы, у тым ліку беларусаў, а таксама паменшыла б нагрузку на польскія органы, звязаную з неабходнасцю штогадовага пачатку працэдуры атрымання новага праязнога дакумента”.

Аб маючай адбыцца сустрэчы з Цытрыновічам Латушка паведаміў на прэс-канферэнцыі ў Варшаве 13 студзеня.

13 снежня 2025 года ў рамках дамоўленасцяў паміж Мінскам і Вашынгтонам Аляксандр Лукашэнка вызваліў 123 чалавекі (110 грамадзян Беларусі і 13 замежнікаў) з умовай іх наступнага ад’езду з краіны.

109 беларусаў і пяць украінцаў прыбылі на тэрыторыю Украіны. Яшчэ адзін палітвязень, лаўрэат Нобелеўскай прэміі міру, кіраўнік праваабарончага цэнтра “Вясна” Алесь Бяляцкі быў высланы ў Літву.

Вялікая група з 89 беларускіх палітвязняў у ноч на 18 снежня прыбыла з Украіны ў Варшаву.

Сярод прыбылых у польскую сталіцу былі Марыя Калеснікава і Віктар Бабарыка, якія пасля з’ехалі ў Германію.

20 чалавек прыехала ў Вільнюс.