Урач Руслан Бадамшын прыгавораны да пазбаўлення волі, у 2020 годзе яго арыштоўвалі пяць разоў, раней судзілі па крымінальнай справе
16 студзеня, Позірк. Да пазбаўлення волі прыгавораны ўрач-неўролаг Руслан Бадамшын, паведамляе ініцыятыва “Белыя халаты”.
У паведамленні гаворыцца, што тэрмін зняволення склаў 2,6 года. Магчыма, маецца на ўвазе 2 гады і 6 месяцаў.
Паводле даных ініцыятывы, Бадамшыну прызначана пакаранне ва ўмовах агульнага рэжыму.
Крымінальная справа ў дачыненні да ўрача-неўролага, былога палітвязня Руслана Бадамшына, была распачатая ў чэрвені 2025 года. Тады ж ён быў затрыманы.
Яму прад’явілі абвінавачванне паводле арт. 3614 Крымінальнага кодэкса (садзейнічанне экстрэмісцкай дзейнасці).
7 траўня 2024 года суд Фрунзенскага раёна Мінска прыгаварыў Бадамшына да 3 гадоў абмежавання волі без накіравання ў ПУАТ паводле арт. 342 КК (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх). Паводле гэтага ж артыкула за ўдзел у акцыях пратэсту была асуджаная таксама жонка лекара Таццяна Бадамшына.
Са жніўня 2020 года мужчына правёў пад арыштам 63 дні, затрымліваўся па адміністрацыйных абвінавачваннях пяць разоў. У 2021 годзе быў звольнены з РНПЦ нейрахірургіі праз спазненне на працу ў дзень вызвалення з ізалятара. Пасля гэтага працаваў у прыватным медцэнтры.
