Праз аварыю на цепламагістралі ў пяці раёнах Мінска пагоршылася ацяпленне

19 студзеня, Позірк. Пра аварыю на ўчастку цеплавой магістралі № 41 паведаміла раніцай 19 студзеня дзяржаўнае прадпрыемства “Мінскэнерга”.

Як зазначаецца, праз гэта “адбылося зніжэнне тэмпературы цепланосбіта часткі спажыўцоў” у Фрунзенскім, Маскоўскім, Цэнтральным, Савецкім і Кастрычніцкім раёнах сталіцы.

Энергетыкі працуюць над “высвятленнем прычын пашкоджання”.

“Цяпер вядуцца работы па аднаўленні тэмпературнага і гідраўлічнага рэжыму працы сістэмы цеплазабеспячэння, — гаворыцца ў паведамленні. — Адмыслоўцы робяць усё магчымае для больш хуткай ліквідацыі наступстваў і нармалізацыі параметраў падачы гарачай вады”.

Паводле прагнозу Белгідрамета, сёння ранкам у сталіцы чакаецца 17–19 градусаў марозу, удзень — 9–11, увечары — 14–16.