20 студзеня, Позірк. Камітэт дзяржаўнай бяспекі 15 студзеня прызнаў арганізацыю Free Belarus Center “экстрэмісцкім фарміраваннем”, у адпаведны спіс на сайце Міністэрства ўнутраных спраў яна ўнесеная 20 студзеня.
У пераліку згадваюцца старонкі ініцыятывы ў “Фэйсбуку”, “Тэлеграме”, “Інстаграме”, а таксама ютуб-канал.
Паводле версіі МУС, да Free Belarus Center маюць дачыненне Марта Скугарава, Альвіна Мінгазава, Паліна Бродзік і Іван Марозька.
Free Belarus Center аказвае юрыдычную і псіхалагічную дапамогу. Офісы ініцыятывы адчыненыя ў Варшаве і Кіеве. Ініцыятыва дапамагла эвакуявацца людзям у больш бяспечныя месцы ва Украіне і па-за яе межамі пасля пачатку вайны Расіі супраць Украіны ў лютым 2022 года.
Цяпер у “пераліку арганізацый, фарміраванняў, індывідуальных прадпрымальнікаў, якія маюць дачыненне да экстрэмісцкай дзейнасці”, які сумесна вядуць МУС і КДБ, 325 пазіцый.
