Шкода ад несанкцыянаваных плацежных аперацый у 2025 годзе перавысіла 54 млн рублёў — Нацбанк

20 студзеня, Позірк. Шкода, нанесеная грамадзянам і прадпрыемствам несанкцыянаванымі плацежнымі аперацыямі, у 2025 годзе перавысіла 54 млн рублёў (17,6 млн долараў), паведамляе прэс-служба Нацыянальнага банка.

Паводле інфармацыі рэгулятара, больш за 92% гэтай сумы “выкрадзена з выкарыстаннем метадаў сацыяльнай інжынерыі”.

“Для вываду выкрадзеных сродкаў зламыснікі выкарыстоўвалі пераводы на адрас атрымальнікаў у замежных банках — 32,1% сумы выкрадзеных грашовых сродкаў; вывад грашовых сродкаў праз крыптавалюту і гульнявыя ўстановы — 28,3%; абнаяўленне грашовых сродкаў па токенах і з выкарыстаннем тэхналогіі NFC — 21,5%; аплату тавараў і паслуг у арганізацыях гандлю і сэрвісу па ўсім свеце — 12,7%”, — гаворыцца ў паведамленні.

Адзначаецца, што з дапамогай “антыфрод-сістэм і інфармацыі з аўтаматызаванай сістэмы апрацоўкі інцыдэнтаў Нацбанка” ў беларускіх банкаў летась “атрымалася прадухіліць крадзяжы на суму каля 5 млн рублёў”.