У Беларусі акрэдытаваны новы вайсковы аташэ В’етнама
24 студзеня, Позірк. Аташэ па пытаннях абароны В’етнама Као Нгок Ха акрэдытаваны пры Міністэрстве абароны Беларусі, паведаміў 23 студзеня начальнік дэпартамента міжнароднай вайсковай супрацы (МВС) — памочнік міністра па пытаннях МВС Валерый Равенка.
“Абмеркаваныя мерапрыемствы МВС на 2026 год. Так, спланаваныя візіты ў Рэспубліку Беларусь начальнікаў Генеральнага штаба, галоўнага палітычнага ўпраўлення; вучэнні ў В’етнаме з удзелам падраздзялення УС РБ”, — напісаў ён на сваёй старонцы ў сацыяльнай сетцы Х.
Вынікам працы папярэдняга вайсковага аташэ Нгуен Ван Цьена прадстаўнік беларускага Мінабароны назваў “значную актывізацыю” стасункаў, шэраг візітаў высокага ўзроўню, падпісанне трох міжведамасных пагадненняў, а таксама навучанне ў вайсковых ВНУ Беларусі в’етнамскіх вайскоўцаў.
Летась у снежні В’етнам наведваў дзяржаўны сакратар Савета бяспекі Аляксандр Вальфовіч. Падчас візіту чыноўнік заявіў, што супраца ў сферы бяспекі “стала сапраўдным драйверам беларуска-в’етнамскіх стасункаў, у тым ліку гандлёва-эканамічных”.
Вальфовіч і міністр грамадскай бяспекі В’етнама Лыонг Там Куанг падпісалі пратакол аб стварэнні сумеснай працоўнай групы па пашырэнні і ўмацаванні супрацы ў сферы бяспекі. Бакі таксама разгледзелі “напрамкі вайскова-тэхнічнай супрацы — як тыя, што ўжо рэалізуюцца, так і тыя, што прапрацоўваюцца; сумеснай працы сілавых блокаў дзвюх краін па процідзеянні сучасным рызыкам, выклікам і пагрозам”.
Дзяржсакратар Савета бяспекі паведаміў, што толькі на працягу 2024–2025 гадоў “па лініі ваеннага ведамства, спецслужбаў і праваахоўных органаў праведзеныя дзесяткі сустрэч рознага ўзроўню”, “бакамі падпісана каля 10 міжведамасных дакументаў аб супрацы”, дзейнічае “змешаная беларуска-в’етнамская камісія”.
“Маюцца канкрэтныя прыклады эфектыўнага ўзаемадзеяння ў такой адчувальнай і важнай сферы, як барацьба з тэрарызмам і экстрэмізмам. Кіраўніцтва В’етнама, як і мы, усведамляе небяспеку пагроз, што зыходзяць ад міжнароднага тэрарызму”, — сказаў ён.
У лістападзе 2024 года стала вядома, што былы ваяр палка імя Кастуся Каліноўскага Васіль Верамейчык быў дастаўлены ў Беларусь пад канвоем. Паводле інфармацыі яго паплечнікаў па КР, мужчына быў затрыманы 13 лістапада ў Хашыміне (В’етнам) і перададзены ў Беларусь.
У лістападзе 2025-га прыгавораны да 13 гадоў пазбаўлення волі ва ўмовах узмоцненага рэжыму.
Летась 25 кастрычніка ў Ханоі міністр унутраных спраў Беларусі Іван Кубракоў і генеральны сакратар Цэнтральнага камітэта Камуністычнай партыі В’етнама То Лам абмеркавалі барацьбу з транснацыянальнай злачыннасцю, кіберзлачынствамі, наркагандлем, нелегальнай міграцыяй, а таксама супрацу ў сацыяльна-эканамічнай сферы.
Незадоўга да Кубракова В’етнам наведваў начальнік Генеральнага штаба Узброеных сіл — першы намеснік міністра абароны Павел Муравейка.
Летась у траўні Мінск наведваў То Лам. На сустрэчы з ім Аляксандр Лукашэнка заявіў пра гатоўнасць аднавіць пастаўкі ў В’етнам прадукцыі вайскова-прамысловага комплексу Беларусі.
