Прычынай смерці актывіста Уладзіміра Усера ў Польшчы сталі цяжкія захворванні, заяўляе яго дачка

24 студзеня, Позірк. Пажылы актывіст з Бабруйска Уладзімір Усер, што жыў у Польшчы, памёр летась у снежні ад цяжкіх захворванняў, вынікае з паведамлення яго дачкі Марыны Авітан.

На сваёй старонцы ў “Фэйсбуку” Авітан адзначыла, што з’яўляецца адзіным сваяком Усера і адзіным чалавекам, які мае “поўную, пацверджаную і афіцыйную інфармацыю” пра бацьку.

“Ніякіх пабояў не было. Мой бацька не паміраў у выніку гвалту. Прычына смерці афіцыйна высветленая і зафіксаваная дакументальна: цяжкая форма хранічнага цукровага дыябету, інсулінавая кома, а таксама сур’ёзныя сардэчна-сасудзістыя захворванні, якія мелі ў тым ліку генетычную прыроду”, — напісала яна.

У сакавіку 2025 года на беларускім тэлебачанні выйшаў прапагандысцкі фільм “Чужое неба”, у якім з’явіўся Усер. Пасля актывіст заявіў, што быў падманам уцягнуты ў здымкі. У лістападзе мужчыну затрымалі па справе аб “дзейнасці ў інтарэсах замежнай выведкі супраць Польшчы”, але не ўзяты пад варту — праз стан здароўя. Неўзабаве пасля гэтага ён трапіў у бальніцу, а адтуль — у шэлтар, дзе, паводле інфармацыі СМІ, і памёр.

Дачка актывіста падкрэсліла, што “ўвесь працэс яго затрымання знаходзіўся пад кантролем хуткай медыцынскай дапамогі, якая прысутнічала на месцы і ажыццяўляла неабходны медыцынскі кантроль у адпаведнасці з вызначанымі працэдурамі”.

Авітан падкрэсліла, што “ўсе заявы і версіі”, якія выказвае Анатоль Вайцяхоўскі (некалі заснавальнік баранавіцкай газеты “Шаг”, прадпрымальнік) — сусед Усера па жыллі ў Беластоку, які пасля смерці актывіста вярнуўся ў Беларусь і зняўся ў прапагандысцкім фільме дзяржтэлеканала, “ёсць свядомай хлуснёй і маніпуляцыяй і не маюць нічога агульнага з рэальнасцю”.

“Іх мэта відавочная — дыскрэдытаваць дзяржаву, якая прыняла майго бацьку і надала яму палітычную абарону, а таксама стварыць інфармацыйнае прыкрыццё для спробы апраўдаць нечае вяртанне на тэрыторыю Рэспублікі Беларусь, — напісала яна. — Перад кім і з якой мэтай патрабуецца падобнае “апраўданне”, застаецца адкрытым пытаннем”.

Паводле слоў дачкі Усера, Вайцяхоўскі меў доступ да яго банкаўскай карткі, кампутара, тэлефона і асабістых рэчаў, вывез асабістыя дакументы актывіста за межы Польшчы.

“У сукупнасці гэтыя абставіны сведчаць пра наяўнасць уласных, далёка не бескарыслівых інтарэсаў. Я б сур’ёзна задумалася над тым, чаму спадар Анатоль з такой настойлівасцю спрабуе атрымаць інфармацыю пра майго бацьку, пра яго цела і пра ўсе абставіны здарэння. На гэтым фоне падобная актыўнасць выглядае не клопатам, а спробай стварыць патрэбны яму інфармацыйны шум”, — адзначыла яна.

Заява Авітан з’явілася на наступны дзень пасля таго, як Вайцяхоўскі паведаміў пра сустрэчу з былым суддзёй Томашам Шмытам, які ўцёк з Польшчы ў Беларусь, а цяпер узначальвае створаны ім на беларускай тэрыторыі фонд “Польская праўда”.

Мужчына напісаў, што звярнуўся ў фонд “за прававой падтрымкай”. Паводле яго слоў, Шмыдт “з разуменнем паставіўся да сітуацыі, якая склалася, пільна вывучыў усе матэрыялы справы пра смерць У. Усера, а таксама праз свае каналы ўдакладніў іншыя абставіны”.

“Цяпер мы сумесна рыхтуем афіцыйныя звароты для дзяржаўных органаў Польшчы. Як адзіны відавочца здарэння, я маю намер даць падрабязныя паказанні супрацоўнікам польскай пракуратуры, паведаміць усе вядомыя мне факты [пра затрыманне Усера] і спрыяць высвятленню ісціны, а таксама прыцягненню вінаватых да адказнасці ў адпаведнасці з польскім заканадаўствам. Я асабіста заняўся гэтым пытаннем і ўпэўнены, што хуткім часам вінаватыя панясуць заслужанае пакаранне”, — адзначыў ён.