Калі пасля вызвалення адных палітвязняў з’яўляюцца іншыя, мы лечым толькі сімптомы хваробы — Freedom House

Апублікавана на адкрытай версіі “Позірку” 4 лютага 2026 года ў 09:57

4 лютага, Позірк. Калі нягледзячы на вызваленне часткі палітвязняў, у Беларусі з’яўляюцца новыя, гэта значыць, што “мы лечым сімптомы хваробы, а не яе прычыну“. З такой заявай выступіў кіраўнік літоўскага офіса праваабарончай арганізацыі Freedom House Віціс Юрконіс на слуханнях, прысвечаных сітуацыі з правамі чалавека ў Беларусі. Мерапрыемства прайшло 3 лютага ў Камісіі па правах чалавека Тома Лантаса ў Кангрэсе ЗША.

Паводле слоў Юрконіса, у сваім узаемадзеянні з Беларуссю ЗША павінны ўлічваць, што адно толькі вызваленне зняволеных не зменіць асноватворную сістэму рэпрэсій у краіне.

Як лічыць прадстаўнік праваабарончай арганізацыі, ЗША павінны пастаянна прыцягваць увагу да ўмоў утрымання пад вартай беларускіх палітвязняў, стаўлення да іх пасля вызвалення, а таксама падкрэсліваць, што вызваленне часткі вядомых зняволеных не здымае з рэжыму адказнасці за стан больш за тысячу іншых з іх, якія застаюцца за кратамі.

На думку Юрконіса, Вашынгтону варта заклікаць афіцыйны Мінск да безумоўнага вызвалення ўсіх палітвязняў, зняцця ўсіх палітычна матываваных абвінавачванняў і гарантавання таго, што ўсе вызваленыя змогуць застацца ў краіне, а не прымушацца да высылкі з яе.

Ён заклікаў дэмакратычныя ўрады пацвердзіць і ўзмацніць падтрымку Святланы Ціханоўскай, “законна абранага лідара Беларусі“, забяспечыўшы, каб яна і іншыя дэмакратычна выбраныя прадстаўнікі беларускіх дэмсілаў прызнаваліся ў якасці законных прадстаўнікоў беларускага народа.

Юрконіс выказаў меркаванне, што ЗША павінны ставіць у якасці ўмовы зняцця санкцый з Беларусі яе адмову ад падтрымкі расійскай агрэсіі ва Украіне, вывад расійскіх вайскоўцаў і ядзернай зброі з беларускай тэрыторыі і папярэджваць аб аднаўленні санкцый, калі ваенныя і ядзерная зброя будуць вернутыя.

Камісія па правах чалавека Тома Лантаса (Tom Lantos Human Rights Commission) — двухпартыйная камісія па правах чалавека пры Палаце прадстаўнікоў Кангрэсу ЗША.

Яна сочыць за сітуацыяй з правамі чалавека ў розных краінах, праводзіць адпаведныя слуханні і брыфінгі, дае рэкамендацыі амерыканскім заканадаўцам і ўрадавым структурам.

Акрамя Юрконіса ў якасці сведак на слуханнях 3 лютага выступілі экс-палітвязень Сяргей Ціханоўскі, дарадца Святланы Ціханоўскай па дыпламатычных пытаннях Дзяніс Кучынскі і міжнародны юрыст па правах чалавека з ЗША Язмін Д. Кэмеран.