У Расіі знішчана 40,8 т увезеных з Беларусі польскіх і нідэрландскіх груш

7 лютага, Позірк. 40,8 тоны ўвезеных з тэрыторыі Беларусі груш знішчана 4–5 лютага на палігоне ў Пскоўскай вобласці Расіі, паведамляе Федэральная служба па ветэрынарным і фітасанітарным наглядзе (Рассельгаснагляд).

Паводле інфармацыі ведамства, садавіну ўтылізавалі ў адпаведнасці з указам Уладзіміра Пуціна № 391 ад 29 ліпеня 2015 года, згодна з якім у РФ забараняецца ўвозіць харчаванне, вырабленае ў краінах, што ўвялі эканамічныя санкцыі ў дачыненні да расійскіх юрыдычных і фізічных асоб. Такая прадукцыя мае быць знішчаная.

Заяўляецца, што грушы былі дастаўленыя ў Пскоўскую вобласць РФ з беларускай тэрыторыі двума грузавікамі ў абыход фітасанітарных пастоў і без неабходных суправаджальных дакументаў.

На скрынях з садавінай былі этыкеткі з пазначэннем краін паходжання — Польшча і Нідэрланды. З апублікаванай ведамствам фатаграфіі вынікае, што імпарцёрам прадукцыі ёсць беларускае ТАА “ФрутаБаскет”.

Транспартныя сродкі перададзеныя супрацоўнікам Рассельгаснагляду для “правядзення мерапрыемстваў у рамках ускладзеных паўнамоцтваў”, гаворыцца ў паведамленні.

Некалькімі днямі раней Рассельгаснагляд паведаміў пра знішчэнне ў перыяд з 21 студзеня па 3 лютага на палігоне ў Пскоўскай вобласці 79,6 т польскіх груш. На тэрыторыю краіны прадукцыя трапіла ў чатырох грузавіках з Беларусі — таксама ў абыход фітасанітарных пастоў і без неабходных дакументаў.

Такім чынам, ад пачатку 2026 года ў РФ знішчана ўжо 120,4 т гэтай садавіны, прывезенай з беларускай тэрыторыі.

Пра спыненне пастаўкі ў РФ буйных партый груш і корму для жывёл 4 лютага паведаміў Дзяржаўны мытны камітэт.

“У першым выпадку гомельскія мытнікі спынілі ў Добрушскім раёне два беларускія грузавікі, у якіх без неабходных таварасуправаджальных дакументаў, у тым ліку сертыфікатаў, што пацвярджаюць бяспеку прадукцыі, перамяшчалі 40 тон груш. Агульны кошт садавіны, якая незаконна вывозілася, склала каля 270 тыс. рублёў”, — заявіла беларускае мытнае ведамства.