Былы намеснік дырэктара мінскага агенцтва па дзяржрэгістрацыі і зямельным кадастры абвінавачваецца ў карупцыі
10 лютага, Позірк. Для вызначэння падсуднасці Генеральная пракуратура накіравала ў Мінскі гарадскі суд крымінальную справу былога намесніка дырэктара сталічнага агенцтва па дзяржаўнай рэгістрацыі і зямельным кадастры. Ён абвінавачваецца паводле ч. 2 арт. 430 (атрыманне хабару) і ч. 2 арт. 424 (злоўжыванне ўладай або службовымі паўнамоцтвамі) Крымінальнага кодэкса, паведамляе нагляднае ведамства.
Згодна з матэрыяламі справы, абвінавачаны не пазней за снежань 2023 года дамовіўся з прадстаўніком рыэлтарскіх арганізацый пра перадачу апошняму фота праваўстанаўліваючых дакументаў на аб’екты нерухомасці за ўзнагароджанне ў памеры 10 долараў ЗША за кожны здымак. Доступ да дакументаў абвінавачаны меў у сувязі са службовым становішчам, якое займаў.
Ад 1 снежня 2023 года да 15 красавіка 2025 года ён накіраваў фотаздымкі дакументаў не менш як 582 аб’ектаў нерухомасці. За гэта ён ад 1 студзеня 2024 года да 25 студзеня 2025 года прыняў ад хабарадаўцаў у Мінску ў некалькі прыёмаў не менш як 16,4 тыс. рублёў.
Каб выканаць дамоўленасці, абвінавачаны ўваходзіў у інфармацыйныя сістэмы агенцтва і шукаў звесткі пра запытаныя аб’екты. Ён жа даваў вусныя ўказанні падначаленым, якія не ведалі пра яго злачынны намер, аб прадстаўленні яму рэгістрацыйных спраў, што захоўваліся ў архіве. Пасля атрымання неабходных дакументаў абвінавачаны фатаграфаваў іх на мабільны тэлефон і перасылаў выявы прадстаўніку рыэлтарскіх кампаній праз мэсэнджары.
Мужчына знаходзіцца пад вартай.
Фатаграфіі дакументаў на аб’екты нерухомасці давалі рыэлтарам, якія іх атрымалі, канкурэнтныя перавагі ў выглядзе доступу да інфармацыі аб праве ўласнасці, а таксама кантакты ўласнікаў.
У Беларусі пяты год запар пагаршаецца сітуацыя з карупцыяй, сведчыць “Індэкс успрымання карупцыі”, які штогод вылічвае міжнародная недзяржаўная арганізацыя Transparency International (штаб-кватэра ў Берліне).
Індэкс вызначаецца на аснове ўспрымання ўзроўню карупцыі экспертамі і прадстаўнікамі бізнесу 180 краін і тэрыторый. Дзяржавам прысвойваюць балы — ад 0 (сур’ёзная карупцыя) да 100 (поўная адсутнасць карупцыі).
Па выніках 2025 года Беларусь набрала 31 бал (у 2024-м — 33, у 2023-м — 37, у 2022-м — 39, у 2021-м — 41, у найлепшым для сябе 2020-м — 47) і падзяліла 124-е месца (годам раней 114-е) з Джыбуці, Манголіяй, Нігерам, Турцыяй і Узбекістанам.
Згодна з данымі Вярхоўнага суда Беларусі, якія раней прыводзіў “Позірк”, у студзені — чэрвені 2025 года за здзяйсненне карупцыйных злачынстваў асуджана 304 чалавекі — на 7,3% менш, чым за той жа перыяд 2024-га (328). З іх 84 прыгавораныя да пазбаўлення волі.
Аляксандр Лукашэнка прыйшоў да ўлады ў сярэдзіне 1990-х гадоў шмат у чым дзякуючы вобразу барацьбіта з карупцыяй і працягвае выкарыстоўваць гэтую тэму. За 30 гадоў карупцыя так і не была пераможаная.
