Мінск пацвердзіў інфармацыю пра візіт высокапастаўленага супрацоўніка МЗС Францыі

12 лютага, Позірк. Пра візіт у Мінск дырэктара дэпартамента кантынентальнай Еўропы галоўнага дэпартамента па палітычных пытаннях і пытаннях бяспекі МЗС Францыі Брыса Ракфёя паведаміла беларускае знешнепалітычнае ведамства. Візіт адбыўся 5-6 лютага на запрашэнне беларускага боку.

Прэс-сакратар МЗС Руслан Варанкоў, каментуючы на просьбу расійскага інфармагенцтва “РИА Новости“ адпаведную інфармацыю французскага выдання Le Monde, заявіў, што “такія візіты не з’яўляюцца чымсьці незвычайным“, а беларускі бок “падтрымлівае рэгулярныя працоўныя кантакты як з Францыяй, так і з іншымі заходнімі дзяржавамі”.

Пры гэтым, паводле яго слоў, дыялог як па двухбаковых каналах, так і на палях шматбаковых мерапрыемстваў часцяком мае канфідэнцыйны характар.

Варанкоў паведаміў пра перамовы французскага дыпламата з намеснікам міністра замежных спраў Беларусі Ігарам Сакрэтай. Акрамя таго, Ракфёй “правёў кансультацыі з прадстаўнікамі беларускай экспертна-аналітычнай супольнасці“ (у Беларусі дазволеная толькі дзейнасць экспертаў, якія падтрымліваюць уладу; нелаяльныя або ў зняволенні, або ў эміграцыі. — “Позірк”.).

7 кастрычніка 2025 года ў Парыжы беларускі дэмакратычны лідар Святлана Ціханоўская абмеркавала крокі па вызваленні беларускіх палітвязняў на сустрэчы з міністрам Еўропы і замежных спраў Францыі Жан-Наэлем Баро.

Прэс-служба Ціханоўскай паведамляла, што бакі абмеркавалі таксама палітыку Францыі ў дачыненні да Беларусі і ваенна-палітычную сітуацыю ў рэгіёне, падтрымку незалежных СМІ і магчымасць пашырэння выдачы віз беларусам.

Адзначалася, што дэмлідар падзякавала Францыі за “паслядоўную падтрымку беларускага народа“, працу спецыяльнага прадстаўніка па Беларусі і “ўвагу да лёсу <…> краіны“.

Летась 2 кастрычніка Ціханоўская сустрэлася ў Капенгагене з прэзідэнтам Францыі Эманюэлем Макронам на палях саміту Еўрапейскай палітычнай супольнасці і падзякавала за паслядоўную падтрымку дэмакратычнай Беларусі і салідарнасць з беларускім народам.

“Для нас вельмі каштоўна, што Францыя працягвае стаяць побач у барацьбе за свабоду і правы чалавека“, — адзначыла яна.

Перад гэтым Ціханоўская размаўляла з Макронам у траўні 2025 года.