МУС дадало ў спіс “экстрэмістаў” 22 чалавекі

20 лютага, Позірк. У спіс “асоб, што маюць дачыненне да экстрэмісцкай дзейнасці”, 20 лютага дададзена яшчэ 22 чалавекі. Цяпер у размешчаным на сайце Міністэрства ўнутраных спраў пераліку 6.320 пазіцый.

Сярод іх восем чалавек, якіх праваабарончая супольнасць прызнае палітвязнямі. Усе яны асуджаныя паводле арт. 361⁴ Крымінальнага кодэкса (садзейнічанне экстрэмісцкай дзейнасці) у рамках справы “Беларускага Гаюна”.

Гаворка пра Віталя Каваленку (асуджаны на 3 гады пазбаўлення волі, узмоцнены рэжым), Мікіту Нячаева (3 гады, агульны рэжым), Аляксандра Гардзеенку і Андрэя Вусіка (выракі праваабаронцам невядомыя), насупраць прозвішчаў якіх стаіць пазнака “адбывае пакаранне”.

Гэта таксама Аляксандр Дулеба (асуджаны таксама паводле арт. 368 — “абраза прэзідэнта”), Аляксандр Лобузаў (таксама паводле арт. 342 — “арганізацыя і падрыхтоўка дзеянняў, што груба парушаюць грамадскі парадак, або актыўны ўдзел у іх”), Уладзімір Патапенка і Сяргей Сікорскі. Побач з іх прозвішчамі стаіць пазнака “судзімасць не пагашаная”, якая, як правіла, кажа пра вынясенне прыгавору, звязанага з абмежаваннем, а не пазбаўленнем волі.

З пазнакай “адбывае пакаранне” ў спіс таксама ўнесеныя асуджаныя паводле арт. 361⁴ Аляксей Пустаход, Раман Карпаў, Віталіна Міхаленя, Анатоль Арцёмчанка і Антон Казачэнка.

Дададзены ў спіс Віталь Абадэнка, які, згодна з дакументам “адбывае пакаранне”, асуджаны паводле арт. 13 (падрыхтоўка да злачынства), 361³ (удзел на тэрыторыі замежнай дзяржавы ва ўзброеным фарміраванні або ўзброеным канфлікце, ваенных дзеяннях, вярбоўка або падрыхтоўка асоб да такога ўдзелу) і 290⁵ (арганізацыя дзейнасці тэрарыстычнай арганізацыі і ўдзел у дзейнасці такой арганізацыі).

Глеб Рыбчанка, які таксама “адбывае пакаранне”, асуджаны паводле арт. 13, 130 (распальванне расавай, нацыянальнай, рэлігійнай або іншай сацыяльнай варожасці або варажнечы), 289 (акт тэрарызму), 290⁴ (стварэнне арганізацыі для ажыццяўлення тэрарыстычнай дзейнасці або ўдзел у ёй), 309 (наўмыснае прывядзенне ў непрыдатнасць транспартнага сродку або шляхоў зносін), 367 (паклёп у дачыненні да прэзідэнта), 368 і 369¹ (дыскрэдытацыя Беларусі).

З пазнакай “судзімасць не пагашана” спіс папоўнілі асуджаныя паводле арт. 361⁴ Андрэй Рагуля, Юрый Гарачаў, Дамір Хасаншын, Дзмірый Галавацкі, Сяргей Сіротка, Міхаіл Каласоўскі і Максім Булаўскі.

Рэжым Аляксандра Лукашэнкі рэгулярна папаўняе спісы “экстрэмістаў” і “тэрарыстаў”, “экстрэмісцкіх фарміраванняў” і такой жа “інфармацыйнай прадукцыі”, закладваючы “аснову для працягу дзяржаўнага тэрору і рэпрэсій”, адзначалася ў студзеньскім дакладзе праваабарончага цэнтра “Вясна”.