Варшаўскі суд 5 сакавіка правядзе папярэдняе пасяджэнне па справе пра напад на Латушку ўлетку 2025 года

22 лютага, Позірк. Папярэдняе пасяджэнне па справе пра напад на намесніка кіраўніцы Аб’яднанага пераходнага кабінета (АПК), кіраўніка Народнага антыкрызіснага ўпраўлення Паўла Латушку ўлетку 2025 года ў польскай сталіцы прызначанае на 5 сакавіка ў судзе раёна Варшава-Срудмесце, вынікае з інфармацыі прэс-службы АПК.

Паводле слоў палітыка, якія прыводзіць структура, суд паведаміў яму, што ў гэты дзень адбудзецца “пасяджэнне па разглядзе абвінаваўчага заключэння, унесенага Раённай пракуратурай Варшавы, аб вынясенні прысуду ў дачыненні да Яўгена Казанцава”.

Адзначаецца, што Казанцаву выстаўленыя абвінавачанні паводле ч. 1 арт. 212 (паклёп) і ч. 1 арт. 217 (парушэнне фізічнай недатыкальнасці) Крымінальнага кодэкса Польшчы.

Апісаная палітыкам сутнасць пасяджэння кажа пра тое, што 5 сакавіка суд фактычна будзе вырашаць, ці прызначаць асноўны разгляд справе, вяртаць матэрыялы пракурору на дапрацоўку альбо спыняць вытворчасць, калі для гэтага маюцца падставы.

Напад на Латушку адбыўся 2 ліпеня 2025 года падчас урачыстага сходу ў дэпартаменце ўсходнееўрапейскіх даследаванняў Варшаўскага ўніверсітэта. “Нападнік кінуў у мяне вядро і крычаў на ўсю залу, што я — “здраднік і хацеў спаліць апазіцыянераў”, паўтараючы ўчорашнюю хлусню [Аляксандра] Лукашэнкі. У цяперашні момант ён затрыманы паліцыяй. У апошнія дні я атрымліваў папярэджанні пра планаваныя ў дачыненні да мяне правакацыі і пагрозы жыццю, у тым ліку сёння ранкам”, — заявіў тады палітык.

Напад здзейсніў грамадзянін Беларусі Яўген Казанцаў, гісторык паводле адукацыі, які тады праходзіў навучанне ў рамках праграмы маладых навукоўцаў у Еўрапейскай школе ў Варшаве (Szkoła Europejska w Warszawie; SEW).

Свой учынак мужчына патлумачыў тым, што ў яго “скончылася віза”. Паводле слоў Казанцава, ён “выгарэў і не змог абараніць навуковую працу”, а напад на Латушку дазволіць яму “свабодна вярнуцца ў Беларусь”.

14 ліпеня стала вядома, што Казанцаў дэпартаваны з Польшчы.