23 лютага, Позірк. Выдавецтва Gutenberg Publisher прызнанае “экстрэмісцкім фарміраваннем” паводле рашэння Камітэта дзяржаўнай бяспекі ад 16 лютага. Адпаведнае дапаўненне ў спіс такіх фарміраванняў унесена 23 лютага.
Адзначаецца, што да стварэння выдавецтва маюць дачыненне галоўны рэдактар Валянціна Андрэева і кіраўнік ініцыятывы imago.by Ілля Андрэеў.
У спіс, які знаходзіцца на сайце МУС, унесеныя сайт выдавецтва gutenbergpublisher.eu, а таксама яго акаўнты ў сацсетках — “ЦікТоку“, “Фэйсбуку“, “Тэлеграме“, “Інстаграме“ і “Трэдс“.
“Я ў шоку, — адрэагавала Андрэева ў “Фэйсбуку“. — Не буду храбрыцца: мне нядобра ад гэтай навіны“.
Gutenberg Publisher — беларускае выдавецтва, якое працуе ў Кракаве. Сярод іншага выпусціла пераклад на беларускую мову рамана Джорджа Оруэла “1984“, а таксама “Каласы пад сярпом тваім” Уладзіміра Караткевіча, зборнік экс-палітвязня Андрэя Скурко, раманы Сашы Філіпенкі. Выдавецтва стала 332-м “экстрэмісцкім фарміраваннем” у спісе.
У апошнія дні праваабаронцы паведамлялі пра ганенні на кнігавыдаўцоў у Беларусі.
