За мінулы тыдзень 17 беларусаў добраахвотна пакінулі Польшчу на патрабаванне Варшавы

24 лютага, Позірк. З 16 па 22 лютага больш за 160 замежнікаў пакінула тэрыторыю Польшчы на ​​патрабаванне ўладаў гэтай краіны, паведамляе польская Памежная ахова.

У прымусовым парадку Польшчу пакінулі 26 грамадзян Украіны, 9 — Грузіі, 2 — Узбекістана; добраахвотна з краіны з’ехалі 26 грамадзянін Калумбіі, 20 — Грузіі, 17 — Беларусі.

Тыднем раней самастойна краіну пакінулі 16 беларусаў, прымусова — 3.

Паводле інфармацыі ведамства, сярод “затрыманых замежнікаў” — без удакладнення па краінах паходжання — былі “асуджаныя за шматразовыя крадзяжы і збіванні, кіраванне транспартных сродкаў у стане алкагольнага ап’янення або насуперак вынесенай забароне”. Частка праходзіла паводле абвінавачвання ў “гвалце ў дачыненні да блізкага чалавека, махлярстве з мэтай атрымання матэрыяльнай выгады, публічнай дэманстрацыі парнаграфічных матэрыялаў, выказванні крымінальна караных пагроз, удзеле ў бойцы, збіванні, узломе кватэры, а таксама ў садзейнічанні незаконнаму перасячэнню мяжы і дапамозе ў прыбыцці ў Польшчу”.

У 2025 годзе Памежная ахова Польшчы выканала больш за 9,4 тыс. рашэнняў, якія прадпісваюць замежнікам пакінуць тэрыторыю краіны ў добраахвотным або прымусовым парадку, паведамляў раней партал Onet.pl, які атрымаў адпаведныя даныя ў адказ на свой зварот у ведамства.

Грамадзян Беларусі тычылася амаль 1,3 тыс. (медыя аперавала прыблізнымі лічбамі), ці крыху менш за 14% усіх рашэнняў. Адзначалася, што з гэтай колькасці “каля 130” беларусаў было выслана прымусова (прыкладна 10%).

Згодна з прадстаўленымі ў матэрыяле данымі, за 2024 год (у гэтым выпадку выкарыстаныя дакладныя лічбы) з Польшчы дэпартавалі 1.377 грамадзян Беларусі, у тым ліку ў прымусовым парадку — 66.

Такім чынам, агульная колькасць высланых з польскай тэрыторыі беларусаў у гадавым вымярэнні крыху знізілася, але колькасць прымусова дэпартаваных вырасла прыкладна ўдвая.

На кастрычнік 2025 года ў Польшчы было легалізавана сама меней 146 тыс. грамадзян Беларусі, заявіла 12 снежня 2025 года ў Вільнюсе юрыст Алеся Пажыток, які спецыялізуецца на міграцыйным праве.

Эксперт падкрэсліла, што гэтыя даныя не ўлічваюць беларусаў, якія знаходзяцца ў краіне на падставе віз, знаходзяцца ў чаканні дазволу на жыхарства або рашэння пра наданне міжнароднай абароны.

Спаслаўшыся на даныя афіцыйнай статыстыкі, яна адзначыла, што часовы дазвол на жыхарства ў Польшчы на ​​кастрычнік мела каля 91 тыс. беларусаў (на гуманітарных падставах, паводле працы, навучання, уз’яднання сям’і, прадпрымальніцтва ды інш.), сталы — каля 42 тыс. (з улікам асоб, якія мелі сталае месца жыхарства да 2020 года, а таксама пасля 2020-га, але з “картамі паляка”, польскімі каранямі ды інш.).