Еўрапарламент заклікаў прыцягнуць Расію і беларускі рэжым да адказнасці за ваенныя злачынствы ва Украіне
24 лютага, Позірк. Расія, яе кіраўніцтва і саюзнікі, такія як беларускі рэжым, нясуць поўную адказнасць за вайну, ваенныя злачынствы і злачынства агрэсіі супраць Украіны. Пра гэта гаворыцца ў рэзалюцыі Еўрапейскага парламента, прынятай 24 лютага, у чацвёртую гадавіну поўнамаштабнага ўварвання расійскіх войскаў у суседнюю краіну.
Еўрапарламент заклікае прыцягнуць РФ і беларускі рэжым да поўнай адказнасці за вайну, якая з’яўляецца “жорсткай, несправакаванай, неапраўданай і незаконнай” і ўяўляе сабой “абуральнае парушэнне міжнароднага права і Статута ААН, а таксама беспрэцэдэнтны замах на архітэктуру еўрапейскай бяспекі”.
Еўрапарламент прыняў да ўвагі свае папярэднія рэзалюцыі па Украіне і Расіі і падкрэсліў, што агрэсія Расіі супраць Украіны пачалася ў 2014 годзе з акупацыі часткі Данбаса і анексіі Крыма.
Адзначаецца, што Іран, Паўночная Карэя і Беларусь пастаўляюць Расіі значныя аб’ёмы зброі і боепрыпасаў, Беларусь “дазволіла Расіі выкарыстоўваць сваю тэрыторыю для нападу на Украіну, што паводле міжнароднага права з’яўляецца актам агрэсіі”.
Падкрэсліваецца, што “прынамсі 20.000, а магчыма, да 35.000 украінскіх дзяцей былі гвалтоўна дэпартаваныя ў Расію і Беларусь або затрыманыя на часова акупаваных украінскіх тэрыторыях”.
Адзначаецца, што расійская вайна супраць Украіны сур’ёзна падарвала еўрапейскую і глабальную бяспеку і з’яўляецца часткай больш шырокага імперыялістычнага і экспансіянісцкага парадку дня.
Мірнае пагадненне павінна быць падмацавана надзейнымі і цвёрдымі гарантыямі бяспекі, каб прадухіліць і неадкладна супрацьдзейнічаць любой новай расійскай агрэсіі, адзначае Еўрапарламент.
На думку дэпутатаў, ніякія санкцыі не павінны здымацца да заключэння мірнага пагаднення і пачатку яго ўстойлівага выканання.
У рэзалюцыі ўтрымліваецца заклік да ЕС увесці дадатковыя істотныя санкцыі, такія як поўная забарона на імпарт з Расіі і Беларусі, што застаўся, у прыватнасці, на сыравінныя матэрыялы, якія не падпадаюць пад санкцыі.
Еўрапарламент вітае працяг дыскусій паміж ЕС і краінамі G7 аб увядзенні забароны на марскія паслугі для ўсіх расійскіх экспартных энергарэсурсаў, але настойліва заклікае ЕС і яго дзяржавы-члены дзейнічаць нават без падтрымкі іншых краін G7 і забараніць гандаль і камерцыйную дзейнасць з Расіяй і Беларуссю, надаючы асаблівую ўвагу любым патэнцыйным таварам двайнога прызначэння.
24 лютага 2022 года Расія пачала поўнамаштабную вайну супраць Украіны — найбуйнейшую ў Еўропе пасля Другой сусветнай. Рэжым Аляксандр Лукашэнка надаў арміі РФ тэрыторыю для нападу на суседнюю краіну зімой і вясной 2022 года, а пасля на працягу многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лячылі расійскіх вайскоўцаў. Паводле даных журналістаў-расследавальнікаў, многія беларускія прадпрыемствы цяпер актыўна займаюцца вытворчасцю на карысць расійскага ваенна-прамысловага комплексу.
