Праваабаронцы прызналі палітвязнямі яшчэ восем чалавек

25 лютага, Позірк. Беларуская праваабарончая супольнасць 25 лютага прызнала палітвязнямі яшчэ восем чалавек, вынікае з сумеснай заявы, апублікаванай у тым ліку на сайце цэнтра “Вясна”.

Адпаведны статус атрымалі Павел Шпак (прыгавораны да зняволення паводле арт. 130 і 342 КК), Аляксей Ляўкевіч (арт. 130, 368 і 369), Міхаіл Горбач (арт. 130, 368, 369 і 3611), Таццяна Магнусава (арт. 361, 130, 369¹, 368, 367, 361¹), Сяргей Пахомаў (арт. 361⁴, 368, 369, 130), Віталь Абадзенка (арт. 361³, 290⁵), Сяргей Васільеў (арт. 356) і Пётр Асіпенка (арт. 356 і 342).

Праваабаронцы лічаць, што “разгляд палітычна матываваных крымінальных справаў у закрытым ці фактычна ў закрытым судовым пасяджэнні, у адсутнасць публікі, назіральнікаў і незалежнай прэсы, у створанай уладамі абстаноўцы нецярпімасці да дзейнасці праваабарончых арганізацый і праваабаронцаў і незалежных журналістаў груба парушае працэсуальныя правы абвінавачаных і падрывае давер да якіх бы там ні было доказаў абвінавачання”. Акрамя таго, падрываюць давер да абгрунтаванасці працэсуальных мер “грубыя парушэнні дзяржавай базавых працэсуальных нормаў, у прыватнасці — прэзумпцыі невінаватасці”.

Падпісанты заявы традыцыйна запатрабавалі “перагледзець вынесеныя ў дачыненні да названых палітвязняў выракі і абраныя меры стрымання пры выкананні права на справядлівы разгляд і ліквідацыі фактараў, якія паўплывалі на кваліфікацыю дзеянняў, выгляд і памер пакарання; вызваліць названых палітвязняў, выкарыстаўшы іншыя захады для гарантавання іх яўкі ў суд; неадкладна вызваліць усіх палітычных зняволеных, перагледзець палітычна матываваныя выракі і спыніць палітычныя рэпрэсіі супраць грамадзян краіны”.

Апрача “Вясны” дакумент падпісалі Беларускі ПЭН, Беларускі дом правоў чалавека імя Барыса Звозскава, Беларуская асацыяцыя журналістаў, Беларускі Хельсінкскі Камітэт, “Прававая ініцыятыва” і Lawtrend.

На гэты час у Беларусі статус палітвязня мае 1.146 чалавек.

Даведка “Позірку”:

• арт. 130 — распальванне расавай, нацыянальнай, рэлігійнай або іншай сацыяльнай варожасці або варажнечы;
• арт. 290⁵ — арганізацыя дзейнасці тэрарыстычнай арганізацыі і ўдзел у дзейнасці такой арганізацыі;
• арт. 356 — здрада дзяржаве;
• арт. 361 — заклікі да мер абмежавальнага характару (санкцый), іншых дзеянняў, скіраваных на нанясенне шкоды нацыянальнай бяспецы Рэспублікі Беларусь;
• арт. 361¹ — стварэнне экстрэмісцкага фарміравання або ўдзел у ім;
• арт. 361³ — удзел на тэрыторыі замежнай дзяржавы ва ўзброеным фарміраванні або ўзброеным канфлікце, ваенных дзеяннях, вярбоўка або падрыхтоўка асоб да такога ўдзелу;
• арт. 361⁴ — садзейнічанне экстрэмісцкай дзейнасці;
• арт. 367 — паклёп у дачыненні да прэзідэнта, у тым ліку таго, што спыніў выкананне сваіх паўнамоцтваў;
• арт. 368 — абраза прэзідэнта, у тым ліку таго, што спыніў выкананне сваіх паўнамоцтваў;
• арт. 369 — абраза прадстаўніка ўлады;
• арт. 369¹ — дыскрэдытацыя Рэспублікі Беларусь.