Амаль на 10% зменшылася ў лютым колькасць украінцаў, якія прыбылі ў Беларусь

2 сакавіка, Позірк. У лютым 5.670 грамадзян Украіны прыбылі ў Беларусь, паведамляе Дзяржаўны памежны камітэт.

Праз украінска-беларускую мяжу прыбыло пяць чалавек, транзітам праз Польшчу — 5.018, праз Літву — 629, праз Латвію — 18.

У студзені ў Белаусь прыбыло 6.244 грамадзяніна Украіны. Такім чынам, у студзені колькасць тых, хто прыбыў, зменшылася на 9,1%.

Усяго за 2026 год у Беларусь заехалі 12 440 грамадзян Украіны: праз украінска-беларускую мяжу — пяць, транзітам праз Польшчу — 10.977, праз Літву — 1.401, праз Латвію — 57.

У лютым 2024 года Ігар Кізім, які на той момант займаў пасаду амбасадара па асаблівых даручэннях МЗС Украіны па Беларусі, заявіў у інтэрв’ю “Позірку“, што “Дзяржпагранкамітэт Беларусі займаецца несумленнай падачай лічбаў і чыстай вады маніпуляцыяй“, па ўсёй бачнасці, маючы на ўвазе, што прапаганда спрабуе паднесці гэта як уцёкі ўкраінскіх грамадзян са сваёй краіны, а затым і з краін ЕС у “мірную і стабільную Беларусь“.

“Самае цікавае, што вы нідзе не знойдзеце ў адкрытых крыніцах дадзеных аб колькасці ўкраінцаў, якія выехалі з вашай краіны. Сумленным і прыстойным з боку ГПК было б даваць гэтую статыстыку. Насамрэч гаворка ідзе не пра транзітных уцекачоў ці людзей, якія заехалі ў Беларусь, каб папрасіць прытулак. Гэта, як і раней, простыя паездкі ўкраінскіх грамадзян”, — заявіў тады дыпламат.

Паводле апошніх апублікаваных на сёння даных ААН, па ўсім свеце на 19 студзеня 2026 года было 5.923.870 ўкраінскіх уцекачоў (на 14 лістапада мінулага года іх было 5.880.360), у тым ліку ў краінах Еўропы — 5.374.780 (5.331.720).