69-гадовы жыхар Чавускага раёна памёр, выпадкова выпіўшы антыфрыз падчас рамонту аўтамабіля

3 сакавіка, Позірк. Пра смерць 69-гадовага жыхара Чавускага раёна (Магілёўская вобласць) паведамляе Дзяржаўны камітэт судовых экспертыз (ГКСЭ).

Падчас рамонту аўтамабіля мужчына “выпадкова зрабіў некалькі глыткоў антыфрызу”, гаворыцца ў паведамленні.

“Гэта адбылося ўвечары, мужчына адразу не стаў звяртацца да медыкаў, а раніцай адчуў пагаршэнне стану: з’явіліся трывожныя сімптомы ў выглядзе боляў у жываце, дыхавіцы, млоснасці, ваніты”, — адзначае ГКСЭ.

Пенсіянера ў цяжкім стане шпіталізавалі ў адну з бальніц Магілёва. “Нягледзячы на аказваемую дапамогу, стан пацыента пагаршаўся, на пяты дзень, будучы ў стане комы, ён памёр”, — паведамляе камітэт.

Па выніках экспертызы названая прычына смерці — вострая нырачная недастатковасць, якая развілася ў выніку вострага пераральнага атручвання этыленгліколем.

“Этыленгліколь — двухатамны спірт, які шырока ўжываецца як аснова для антыфрызаў, — з’яўляецца атрутай. Пры трапленні ўнутр выклікае цяжкія атручванні, паражэнне нырак і нервовай сістэмы. Ужыванне ўсяго 100–200 мл гэтага спірту можа прывесці да смяротнага зыходу”, — канстатавалі ў ГКСЭ.