Памілавана 18 чалавек, у тым ліку 15 асуджаных па палітычных матывах

5 сакавіка, Позірк. Аляксандр Лукашэнка памілаваў 18 чалавек, у тым ліку 15 асуджаных па палітычных матывах, вынікае з публікацыі ў неафіцыйным тэлеграм-канале ягонай прэс-службы.

Паведамляецца, што большасць памілаваных — жанчыны (11 чалавек), у шасці з іх ёсць дзеці, якія ў тым ліку маюць інваліднасць і маюць патрэбу ў пастаяннай медыцынскай рэабілітацыі.

Памілаваны таксама дзве шлюбныя пары, “жанчына, якая знаходзіцца на апошніх тэрмінах цяжарнасці, і адна асуджаная, якая пераступіла закон у 16-гадовым узросце”.

“Усе яны падалі хадайніцтва аб памілаванні, прызналі віну, раскаяліся ў зробленым, а таксама абяцалі весці правапаслухмяны лад жыцця”, — сказана ў рэлізе.

11 верасня 2025 года 52 вязні былі вызваленыя ў рамках здзелкі паміж адміністрацыяй прэзідэнта ЗША Дональда Трампа і Аляксандрам Лукашэнкам.

30 снежня мінулага года ён падпісаў указ аб памілаванні 22 чалавек, з іх 20 чалавек былі асуджаныя “за злачынствы экстрэмісцкай накіраванасці”, сярод памілаваных было 15 жанчын і сем мужчын, у 11 чалавек ёсць непаўналетнія дзеці.

19 лютага Лукашэнка памілаваў Наталлю Левую, асуджаную па палітычных матывах. Жанчына знаходзілася на апошніх тэрмінах цяжарнасці.

Практыка вызвалення палітвязняў працягваецца з ліпеня 2024 года. Раней было не менш як 13 хваляў памілаванняў на падставе аналагічных указаў, у выніку якіх на волю выйшла каля 350 чалавек. Паралельна вязняў перыядычна вызваляюць і высылаюць з краіны — рамках дамоўленасцяў прадстаўнікоў адміністрацыі прэзідэнта ЗША з Лукашэнкам.

Разам з тым праваабаронцы рэгулярна прызнаюць палітвязнямі новых людзей, якія падвяргаюцца пераследу з боку ўладаў. Гэта сведчыць аб тым, што рэпрэсіі ў Беларусі працягваюцца.