Ціханоўская асудзіла начны ўдар РФ, які прывёў да ахвяр сярод мірных жыхароў у Харкаве
Наступствы ўдару РФ па доме ў Харкаве ў ноч на 7 сакавіка 2026 года
7 сакавіка, Позірк. Беларускі дэмакратычны лідар Святлана Ціханоўская асудзіла начны ўдар Расіі па Украіне, які прывёў да гібелі сярод мірных жыхароў.
“Яшчэ адна жудасная расійская атака на Харкаў забіла семярых мірных жыхароў, уключаючы дзяцей, у іх дамах, — напісала палітык на сваёй старонцы ў сацыяльнай сетцы Х. — Расія працягвае тэрарызаваць Украіну і ўвесь свет. Ціск на Крэмль мае узмацніцца. Перамога Украіны неабходная для міру і бяспекі ў Еўропе”.
Паводле інфармацыі ўкраінскіх СМІ, у ноч на 7 сакавіка РФ нанесла ўдар дзясяткамі балістычных ракет і сотнямі дронаў. Адна з ракет трапіла ў шматпавярховы дом у Кіеўскім раёне Харкава. Загінула сем чалавек, у тым ліку двое дзяцей.
24 лютага 2022 года Расія распачала поўнамаштабную вайну супраць Украіны — найбуйнейшую ў Еўропе пасля Другой сусветнай. Рэжым Аляксандра Лукашэнкі надаў войску РФ тэрыторыю для нападу на суседнюю краіну ўзімку і ўвесну 2022 года, а пасля на працягу многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лячылі расійскіх вайскоўцаў. Паводле звестак журналістаў-расследавальнікаў, многія беларускія прадпрыемствы цяпер актыўна займаюцца вытворчасцю на карысць расійскага вайскова-прамысловага комплексу.
