МЗС Літвы прапануе дэнансаваць пагадненне аб малым памежным руху з Беларуссю, якое не набыла моц

23 сакавіка, Позірк. Дэнансаваць пагадненне аб памежным перамяшчэнні з Беларуссю прапануе Міністэрства замежных спраў Літвы, паведамляе Delfi.

Ведамства падрыхтавала праект адпаведнай пастановы. Дакумент прадугледжвае магчымасць звярнуцца да прэзідэнта Літвы з просьбай прадставіць у парламент (Сейм) прапанову аб дэнансацыі пагаднення.

Згодна з дакументам, падпісаным Літвой і Беларуссю ў 2010 годзе, пэўным катэгорыям жыхароў прыгранічных раёнаў дазвалялася перасякаць дзяржаўную мяжу без віз з дапамогай спецыяльных дазволаў. Дакумент дазваляў знаходзіцца на 50-кіламетровай прыгранічнай тэрыторыі іншай краіны да 90 дзён на працягу паўгода.

Меркавалася выдаваць дазволы тэрмінам на пяць гадоў пастаянным жыхарам прыгранічных тэрыторый, якія з-за сямейных стасункаў, з эканамічных прычын, з-за культурных сувязяў, а таксама іншых важных прычын планавалі часта знаходзіцца на прыгранічнай тэрыторыі суседняй дзяржавы. Гэтыя дазволы не давалі права на працу.

У 2011 годзе пагадненне было ратыфікавана Сеймам. Аднак яно не набыла моц, “паколькі Беларусь не атрымала паведамлення аб завяршэнні ўнутраных працэдур, неабходных для ўступлення пагаднення ў сілу“, адзначае Delfi.

Выданне спасылаецца на МЗС Літвы, дзе адзначылі, што, паколькі пагадненне не набыла моц і прайшло больш за 15 гадоў з моманту яго падпісання, яно не актуальнае для абодвух бакоў. Дэнансаванне пагаднення адпавядае паслядоўнай знешняй палітыцы і інтарэсам нацыянальнай бяспекі Літвы, адзначае ведамства.

У Беларусі дзейнічае закон ад 10 студзеня 2011 года “Аб ратыфікацыі Пагаднення паміж урадам Рэспублікі Беларусь і урадам Літоўскай Рэспублікі аб парадку ўзаемных паездак жыхароў памежных тэрыторый Рэспублікі Беларусь і Літоўскай Рэспублікі“.

Летась 9 снежня ўрад Літвы абвясціў экстрэмальную сітуацыю дзяржаўнага ўзроўню праз “гібрыдную атаку Беларусі”. Пастанова была прынятая “ў сувязі з пагрозай нацыянальнай бяспецы дзяржавы і небяспекай для жыцця і здароўя людзей, а таксама для маёмасці і (або) навакольнага асяроддзя, якая ствараецца тым, што на тэрыторыю Літвы з Беларусі запускаюцца паветраныя шары, якія перавозяць кантрабанду”.

Дагавор аб малым памежным руху з Польшчай Беларусь падпісала 12 лютага 2010 года (не набыў моц), з Латвіяй — 23 жніўня таго ж года (пачаў дзейнічаць 1 лютага 2012 года, прыпынены з ініцыятывы Латвіі 10 кастрычніка 2022 года).