За суткі на пажарах загінула 5 пяць чалавек, з пачатку года — 237

25 сакавіка, Позірк. За мінулыя дзяжурныя суткі (з 6 гадзін 24 сакавіка да 6 гадзін 25 сакавіка) ахвярамі пажараў стала 5 чалавек, сведчаць даныя Міністэрства па надзвычайных сітуацыях.

Раніцай 24 сакавіка на пажары ў жылым доме ў горадзе Мікашэвічы Лунінецкага раёна Брэсцкай вобласці загінуў мужчына 1954 г.н.

Каля 17:30 24 сакавіка паступіла паведамленне аб узгаранні ў гаражы на тэрыторыі прыватнага домаўладання ў аграгарадку Карма Добрушскага раёна Гомельскай вобласці. На пажары знойдзены загінулы мужчына таксама 1954 г.н.

На месцы пажару ў жылым доме ў вёсцы вуглы Рагачоўскага раёна Гомельскай вобласці 25 сакавіка адразу пасля паўночы выяўленыя загінулыя гаспадыня 1936 г.н. і жанчына 1961 г.н., жонка яе сына, які шпіталізаваны з апёкамі.

25 сакавіка ў 2:51 паступіла паведамленне аб пажары ў жылым доме ў аграгарадку Малейкі Брагінскага раёна Гомельскай вобласці. На пажары знойдзены загінулы гаспадар 1957 г.н.

Прычыны пажараў і гібелі людзей высвятляюцца.

МНС таксама паведамляе пра выбух і пажар у кватэры на другім паверсе двухпавярховага цаглянага чатырохкватэрнага дома ў вёсцы Казіміраўка Гродзенскага р-на. Разбураная кватэра, пашкоджаныя будаўнічыя канструкцыі суседняй і размешчанай ніжэй кватэр, мужчына 1972 г.н. шпіталізаваны.

Дом адключаны ад электра- і газазабеспячэння, арганізавана ахова. Сем жыхароў дома, у т.л. двое дзяцей, будуць пражываць у сваякоў.

Аддзелу архітэктуры і будаўніцтва Гродзенскага райвыканкама даручана арганізаваць абследаванне пашкоджанага жылога дома з прыцягненнем спецыялізаванай арганізацыі для выдачы заключэння аб тэхнічным стане будаўнічых канструкцый. Прычына здарэння высвятляецца.

24 сакавіка МНС паведамляў з нагоды гэтага інцыдэнту, што праз выбух газапаветранай сумесі пачаўся пажар у дзвюх кватэрах на першым і другім паверхах.

Таксама 24 сакавіка ў вёсцы Вусава Капыльскага р-на Мінскай вобласці пры самастойным тушэнні пажару атрымаў апёкі гаспадар 1946 г.н., ён шпіталізаваны.

Адпраўлены ў бальніцу з апёкамі мужчына 1944 г.н., жыхар Гомеля. Ён атрымаў пашкоджанні 23 сакавіка ў выніку загарання на ім адзення пры падрыхтоўцы ежы на газавай пліце.

24 сакавіка да лекараў з апёкамі звярнуўся мужчына 1991 г. н. Ён быў траўмаваны 21 сакавіка ў выніку ўспышкі пароў лёгкаўзгаральнай вадкасці пры распальванні вогнішча ў вёсцы Вечаторава Стаўбцоўскага раёна Мінскай вобласці.

У той жа дзень быў шпіталізаваны мужчына 1969 г.н. з апёкамі, атрыманымі ад успышкі газапаветранай сумесі ў выніку разрыву газавага балончыка на тэрыторыі садовага таварыства каля пас. Дударава Добрушскага раёна Гомельскай вобласці.

24 сакавіка здарыўся пажар у цагляным будынку цэха па вытворчасці арганарастваральных лакафарбавых матэрыялаў у Дзяржынску Мінскай вобласці. Пацярпелых няма.

Паводле звестак МНС, за мінулыя суткі ліквідавана чатыры лясныя пажары на агульнай плошчы 2,72 га і 85 пажараў травы і кустоў на агульнай плошчы 9,552 га.

З пачатку года ахвярамі пажараў стала 237 чалавек (за аналагічны перыяд 2025-га — 189; +25,4%). Траўмавана 203 чалавекі (115; рост у 1,8 раза).

Усяго на тэрыторыі Беларусі з пачатку 2026 года здарылася 2.204 пажары (1.800; +22,4%), у тым ліку 36 — за апошнія суткі.