З’явілася магчымасць рэзерваваць дату ўезду грузавікоў у Беларусь — паслуга ў 21 раз даражэй за “жывую чаргу”

1 красавіка, Позірк. Магчымасць зарэзерваваць дату ўезду грузавога транспартнага сродку ў Беларусь прадугледжаная пастановай Савета міністраў № 152 ад 31 сакавіка.

Згодна з дакументам, апублікаваным 1 красавіка на Нацыянальным прававым інтэрнэт-партале, кошт гэтай паслугі складае 31,5 базавай велічыні (1.417,5 рубля) за адзінку транспарту.

Рэзерваванне даты ўезду ажыццяўляецца на сайце прадпрыемства “Белмытсэрвіс” адначасова з рэгістрацыяй у электроннай чарзе (з 1 студзеня 2026 года анлайн-рэгістрацыя была даступная толькі для легкавых аўтамабіляў і матацыклаў, да таго — ні для каго, транспарт рэгістраваўся ў чарзе на ўезд у зону чакання).

Варта адзначыць, што грузавікі па-ранейшаму могуць рэгістравацца перад зонай чакання ў парадку “жывой чаргі”. Кошт гэтай паслугі застаўся ранейшым — 1,5 базавыя велічыні (67,5 рубля), або ў 21 раз менш, чым спалучанае з анлайн-рэгістрацыяй рэзерваванне дня выезду.

Прэс-служба ўрада, каментуючы падпісанне гэтай пастановы, адзначыла, што “колькасць грузавых аўтамабіляў за суткі, для якіх можа быць зарэзерваваная дата ўезду ў пункт пропуску, будзе вызначацца на ўзгадненне з ДМК і ДПК для кожнага пункта пропуску з улікам прапускной здольнасці”.

Змяненні, як сцвярджаецца, “скіраваныя на падвышэнне эфектыўнасці планавання грузаперавозак”.